Parti Sedar Rakyat Sarawak (Sedar) deka ditumbuhka di negeri tu ba awak ke semak

Dato Othman Abdillah

KUCHING, Sept 13: Media negeri tu mantaika berita madahka siti agi parti politik deka dtumbuhka nyerumba pengawa bepilih kunsil negeri ke datai.

Presiden sementara parti baru nya ke diberi nama Parti Sedar Rakyat Sarawak (Sedar), Datuk Othman Abdillah madahka parti nya dipelaba deka direjister ba Opis Ngerejister Gerempung (RoS) dalam kandang bulan tu.

“Pinta kami untuk ngerejister parti nya udah dianjung sereta diaku RoS nyauka tiga bulan ke udah, iya nya kena 22 Jun,” ku iya.

Iya mega madahka parti baru nya nerima sambut ke manah ari rayat di Sarawak.

Diatu, Sarawak bisi ngembuan mayuh parti ke ditumbuh di negeri tu empu baka Parti Bansa Dayak Sarawak Baru (PBDSB), Teras, Star enggau Sarawak Workers Parti ( SWP) ti deka numbuhka gempung ti diberina nama Sarawak Baru.

Ari Semenanjung bisi empat iti parti ti udah entap diduduk di negeri tu baka PKR, PAS, DAP enggau Amanah, lalu diberitaka mega parti Bersatu deka ngerembaika sayap ke negeri tu.

Negeri Sarawak diatu ari baruh pegai gempung parti ti baru ditumbuh ke asal ari gempung Barisan Nasional suba ke diberi nama Gabungan Parti Sarawak (GPS) ti diarika PBB, PRS, PDP enggau SUPP.

Kelimpah nya bisi siti agi parti ti ngumbai diri bebakih enggau gempung GPS tu iya parti UPP ti betuaika Datuk Seri Wong Soon Koh.

Pengawa bepilih kunsil negeri dipelaba deka diatur ba taun 2021.

Naka ke diatu, GPS ngempu 72 ari 82 kerusi Kunsil Negeri Sarawak. — DayakDaily