SIBU, April 28: Parlimen Sibu deka diperebutka empat iku chalun iya nya ari BN, DAP, SPP, enggau STAR.
Andrew Wong ari BN deka disatup penyandang, Oscar Ling ari DAP, Simon Tiong enggau Jamie Tiew ari STAR enggau SPP.
Andrew disempulang 1,500 penyukung ke bejalai bebala mayuh tama ngagai Palan Ngantung Nama lalu Oscar Ling disempulang urung 170 iku.
Simon Tiong ari STAR datai ba Palan Ngantung Nama disempulang 15 iku penyukung lalu Jamie Tiew ari SPP disempulang 10 iku penyukung.
Ba Pengawa Bepilih Besai ke-13, Oscar Ling udah menang ba Parlimen Sibu ngalahka Temenggung Datuk Vincent Lau ari SUPP nengah majoriti 2841 undi.
Ba pengawa beplih besai ke sekali tu, bisi 74,149 pengundi berejista tau ngundi ba Parlimen Sibu.
Di Julau, chalun BN Datuk Joseph Salang datai ba Palan Ngantung Nama di Opis Pelilih Julau urung 8.20 pagi tu.
Salang disatup chalun bediri Ngati Kediri Larry Sng ke datai ba Palan Ngantung Nama nya urung 8.35 pagi.
Penatai iya maya tu disempulang Baca Manggi nyadi penganjung nama enggau Tibu Junit nyadi penyukung.
Penatai kededua chalun bela disempulang penyukung sida empu. — DayakDaily
