MIRI, Jan 29: Seriris enggau pengawa ngemiakka parti, Parti Pesaka Bumiputera Bersatu (PBB) dijangka bisi ngaga ubah ba ketuai ngiring Pampang Nembiak enggau Indu ba gempuru ke diatur bulan baru.
Tu berindik ari Ketua Nembiak Datuk Seri Fadillah Yusof enggau Ketuai Indu Tan Sri Empiang Jabu enda ngetanka pangku pengawa seduai.
Fadillah ke mega Menteri Kereja Raya ti ngenukuka pekara pengudah aum ke penudi komiti nya kemari, ba aum media ke alai iya madahka sida udah setuju enda mekitka kededua pangku pengawa nya ila.
Ku MP Petrajaya nya, tu setipak enggau pemutus Majlis Kerja Tetinggi PBB empai lama.
“Bisi ubah ba iring ketuai Pampang Nembiak enggau Indu. Aku enda ngetanka penuduk nya,” ku iya.
Diberitaka Fadillah deka bepilih ba penuduk Mandal Presiden.
Pangku pengawa Nembiak diambi ketuai Nembiak ari Pampang Pesaka, lalu penuduk ke puang ti ditinggalka Empiang ari Pampang nya deka diserah ngagai ketuai Indu ari Pampang Indu Bumiputera.
PBB ditumbuh ba taun 1973 pengudah Parti Bumiputera enggau Parti Pesaka begempung.
Sejarah enggau atur ti dikemeran kenyau ari 45 taun ke udah nyadi pelasar penegap enggau pengentap parti ti diseretai raban bansa Bumiptera ari bemacham etnik di Sarawak. — DayakDaily
