KUCHING, 11 Mei: Perintah Besai Pakatan Harapan (PH) ngenuku polisi ngelengkas program pemansang di menua pesisir.
Kaban Parlimen (MP) Lubok Antu, Jugah Muyang, madah polisi nya dikearap ulih ngerapit bida penyeranta entara rayat di menua pesisir enggau kandang mengeri.
“Kitai meseti dulu ngemeratka pemaik rayat alai semua, enggau enda ngira bida politik patut begempung nyaup ngemujur program pemansang di Lubok Antu.
“Kitai enda nerima raban ‘kapitalis’, lalu tu mih jalai ke pemadu manah ti ulih nentuka projek pemansang ke diberi perintah deka nyaup ngangkatka ikas pengidup rayat,” ku iya.
Jugah mansutka jaku nya ba program Ketuai PH Begulai enggau Rayat ke diatur di Palan Rumah Panjai Baru Nanga Menggiling, Lubok Antu, Hari Minggu tu tadi.
Pengerami nya diatur JKKK Rumah Intang nengah saup JKKK Rumah Sabang Batang Ai, Lubok Antu.
Ngenang kaul ke sama, Jugah madah bala ketuai PH enggau ketuai komuniti nyadi jematan penyambung rayat ngagai perintah.
Berindik enggau nya ku iya, kaul manah entara kededua piak tu deka nyaup ngemujur semua projek ke dipejalai.
“Pengeran Perintah Besai sereta kerejasama tu ulih nyaup ngemansut Lubok Antu ari rintai sepuluh pelilih menua ke pemadu seranta di Malaysia.
“Kitai ngarap bala ketuai komuniti meri sukung ke tegap ngagai kitai ngambika semua pengawa enggau polisi pemansang perintah PH ulih dikemujur,” ku iya seraya madah 75 peratus elawin ketuai komuniti dibayar Perintah Besai.
Ba pengerami nya, Jugah bisi ngagihka belanja RM100,000 dikena nyaup pengawa ngaga rumah panjai baru Nanga Menggiling.
Kelimpah ari nya iya mega ngagihka RM10,000 sereta RM5,000 ungkup JKKK enggau Biro Orang Indu Nanga Menggiling.
Tujuh buah rumah panjai ngelingi Nanga Menggiling bela nerima RM10,000 ari Jugah. — DayakDaily
