Orang Ulu diansak nyingkang setipak enggau pemansang ekonomi digital

Datuk Patinggi Abang Johari Tun Openg

MIRI, Nov 7: Ketua Menteri Datuk Patinggi Abang Johari Tun Abang Openg dekaka Orang Ulu maju seriris enggau arus pemansang nengah chara nguasa teknologi digital sereta beambi ulih ari ekonomi digital.

Iya pechaya, pengidup Orang Ulu jemah ila deka manah agi enti mayuh ari rebak bansa nya landik ba teknologi komputer enggau Internet sereta nemu pasal mayuh bengkah teknologi digital.

Bejaku ba Pengerami Makai Lemai diatur Persekutuan Persatuan Orang Ulu Sarawak Malaysia (FORUM) di hotel ditu empai lama, Abang Johari mega mai beratika potensi ngemajuka kandang tanah tinggi raban bansa Orang Ulu tu.

Ku iya, produk asil betanam betupi ulih dijual ngahai menua luar enti nguna ekonomi digital tauka eksport nya nengah e-dagang.

Nengah pengawa numbuhka Kaunsil Pemansang Tanah Tinggi (HDA) enggau Ejensi Pemansang Ulu Rajang (URDA) ari baruh Koridor Kuasa Tau Dikena Baru Sarawak (RECODA), juluk nya ulih dikemujur nyengkaum ngelakuka kandang tanah tinggi nyadi palan dagang temuai.


Abang Johari madahka FORUM nyadi platform ke pemadu manah dikena perintah ngelala sereta kandang menua nyengkaum tanah tinggi.

Iya ngarapka bansa Orang Ulu majak beserakup sereta berasai temegah ati laban FORUM mujur ngempung semilan gerempung etnik Orang Ulu di Sarawak.

Nengah awak nya mega, Abang Johari lalu madahka diri ngemendarka pinta ba tanah ke mungkur pemesai lima ekar di bandar raya Miri endur ngaga bangunan FORUM kelimpa ngungkupka RM250,000 ngagai FORUM dikena melanja aktiviti ninting taun sida. — DayakDaily

Share this article!