KUALA LUMPUR, Nov 30: Kaban Parlimen Sibuti, Datuk Ahmad Lai madah orang ti ngereja penyalah baka beleman mali patut diukum direjang ngena besi angat, berindik ari penyalah nya ke majak balat nyadi diatu.
Bejuraika penemu ba Dewan Rakyat kemari, Ahmad ngenataika langgur penemu nya lebuh ngagaika ukum ke diatu nya enda chukup berat.
“Enti ulih Yang Di Pertua, aku meri langgur penemu ngambika lelaki ti ngereja ulah nya, kitai tunu siti besi angat lalu achuk ngagai iya, ngambika iya ngasaika baka ni asai penyinu ati orang ke dikerejaka nya,” ku iya.
Iya dulu ari tu bisi nujuka siti tanya tambah ngagai Sapit Menteri Pemansang Orang Indu, Ruang Bilik enggau Raban Bansa, Datuk Azizah Mohd Dun pengudah Azizah nyaut tanya Dr Siti Mariah Mahmud (Amanah-Kota Raja) sentang gaya intu enggau pengelantang pendiau ke diberi ngagai nembiak ti dituntung penusah nya enggau sida sebilik pengudah orang ke salah ti mega endur sida bepanggai diukum.
Ku Ahmad, enti orang nya nembiak mit ti kachau apai, aya iya…semua sida sebilik berasai magang.
“Baka nya mega adi iya ke bukai. Baka ni kitai ngapuska dendam sida sebilik ngagai orang ti ngereja pengawa ke enda senunuh ngagai anak menyadi iya?” ku iya. — DayakDaily
