KUCHING, Mac 27: Orang dagang di Sarawak diperansang beambi ulih ari Pemandang Halal Antarabansa Malaysia (MIHAS) 2018 ke diatur Perbadanan Pembangunan Perdagangan Luar Malaysia (Matrade) April tu ila nyadi platform endur mantaika produk negeri tu ngagai renggat global.
Pengarah Matrade Sarawak, Leany Mokhtar madahka nya mega nyadi siti chara ngelaku produk negeri sereta ngerembaika industri di negeri tu lalu nambahka penyampau eksport produk domestik ngagai global.
“Ambil peluang tu awakka dagang kita ngerembai mansang ngagai renggat ke tinggi agi. Ninting taun Matrade ngelaluka orang dagang ngambika enggau ba pemandang.
“Di Sarawak, kitai nganjung lapan ngagai 11 iku orang dagang tiap taun. Semua produk nya bisi potensi besai dijual kelimpah ngembuan kriteria enggau standard ke ditetap,” ku iya.
Iya madah munyi nya ngagai pemberita pengudah nyadi chairman meri penerang khas ngagai orang dagang Sarawak begulai enggau pengari Dagang Antarabansa Malaysia (MITEC), Opis Menteri Dagang Antarbansa enggau Industri (MITI) enggau Matrade empai lama udah.
Pamandang dagangal halal global ke-15 nya deka Pusat Dagang enggau Pemandang Antarabansa Malaysia (MITEC) belabuh April 4 ngagai 7 ti deka datai ti diseretai lebih 800 penyereta nyengkaum ari Thailand, Indonesia, Taiwan, China enggau Filipina.
Ngenang pasal penyereta orang dagang negeri tu sekali tu, Leany madahka nya mayuh ngaul dagang ai irup enggau pemakai (F&B).
“Tu nyengkaum pes pemakai, sambal Pak Leman sereta produk ai irup 3 dalam 1. Tu nyata mandangka orang dagang ari pengagit Sarawak ngiga mayuh agi peluang dagang luar nengah MIHAS 2018,” ku iya.
Lapan kompeni Sarawak ke nyeretai MIHAS 2018 baka Foodtake Industries Sdn. Bhd, Kit Hin Company Sdn.Bhd, Qalha Enterprise, RN Keluarga, MUSC Food Industries Sdn.Bhd, Sixteen Twentynine Sdn Bhd, SPL Food Industries Sdn. Bhd enggau Nicchi Beauty Company.
Kelimpah pemandang, sesi ‘Program Penyumberan Antarabangsa (INSP)’ iya nya ngiga tipak dagang ba komoeni menua tu kelebih agi industri mit enggau jelan pemesai (PKS) mantaika produk sida, mega bela bisi diatur maya MIHAS 2018 nya. — DayakDaily
