Opis Bomba Miri nadai ngerembaika mesej nesau mensia mayuh ngulu program pemadah, interbiu

Firefighters. — DayakDaily.com file pic. // Photo: Pixabay

MIRI, Sept 12: Opis Pengerara Api enggau Penyah Penusah (Bomba) Miri ngenadaika ngerembaika mesej di media sosial ti madahka program meri pemadah pasal kereja enggau interbiu khas nampung pelajar deka diatur di premis sida kena Hari Lima ti deka datai tu.

Ketuai Opis Pengerara Api enggau Penyah Penusah Miri, Law Poh Kiong madahka mesej ke dikerembai nya bula laban bomba Miri nadai kala ngemendarka sesapa ngatur program di premis Bomba Miri baka ti dipadah dalam mesej nya.

“Mensia mayuh ke bisi sebarang tanya tau betelefon ngagai Balai Bomba Miri ba lumur 085-420991, dikena nentuka pengamat pemadah nya,” ku iya ba sebengkah penerang malam kemari.

Kelimpah atur pengawa meri penerang pasal kereja enggau interbiu khas, mesej bula nya mega minta apai indai ngaga bayar pre-rejister sepenyampau RM300 sereta mai salin setipikit SPM anak sida ngagai palan program di Bomba Miri kena Hari Lima tu ari jam 9.30 pagi nyentuk 2 ngalihari.

Mesej nya mega bisi madahka deka meri skolarsip enggau elawin dalam bidang neritka adat, forensik enggau bank khas ungkup kereja baka raban polis, kastam, wataniah enggau Opis Perengka Pengangkut Jalai (JPJ). — DayakDaily