KUCHING, 7 Julai: Mensia mayuh dilalau meretika chara ke betul sentang bakani matau gaya pengerai orang sakit Covid-19 lebuhka kuarantin kediri ba rumah.
Nitihka penerang Dr Boo Cheng Hau, orang sakit Covid-19 meseti dibantu, diembing sereta dikemata tikas pengerai ninting hari.
Berindik enggau nya, Dr Boo madah mensia mayuh patut meretika atur peresa Covid Antigen RTK enggau PCR ti digaga dikena nentu sekalika sesiku orang nya positif tauka negatif Covid-19.
Ku iya, semua asil peresa ukai 100 peratus betul lalu peresa nya meseti suah digaga lalu diperetika engggau silik.
Tajapan asil peresa PCR tauka Antigen RTK negatif, lutur deka minta peresa PCR digaga baru sereta ngadu x-ray tauka CT Scan ba lempuang.
Pekara tu berat enti orang sakit nya dipelaba ngidap Covid-19, kelebih agi ungkup raban risiko tinggi.
Pengamat peresa Antigen RTK dipelaba entara 80-90 peratus.
Enti asil Antigen RTK positif, tau dipadah nyauka 100 peratus betul alai orang sakit nya meseti dikuarantin nitihka atur ke udah ditetap.
Dr Boo siku lutur ti ngembuan mayuh peneleba ba pekara berubat ba spital perintah lalu diatu nyadi Direktor Pekara Berubat ba Klinik Insan Sdn Bhd di Skudai, Johor.
Ngenang kaul ke sama, Dr Boo madah Peresa Antigen RTK bepelasarkan ai liur ngemudah peresa diadu di rumah.
Tang ku iya enggau nyemetak, peresa nya meseti diadu jauh ari bala diri sebilik ngambika virus enda ngelekai ari teritik ai liur.
Tajapia, pengamat peresa RTK ai liur enda 100 peratus lalu meseti digaga suah tauka betanya ngagai lutur.
Nitihka penerang Dr Boo, penyampau 89 peratus orang sakit Covid-19 ba Malaysia enda ngasaika tanda sakit maya asil peresa disahka positif.
Atur Kuarantin Rumah
Ba sentang atur kuarantin di rumah, Dr Boo ke mega Ex-Adun Skudai madah orang sakit meseti enda begulai enggau bala diri sebilik.
Sida patut diau ba siti bilik tinduk sereta bisi bilik mandi tauka agu kediri empu.
Pemakai enggau ai irup meseti enda disegulai enggau pemakai sereta ai irup bala diri sebilik lalu orang sakit enggau bala diri sebilik meseti nguna sengkabung mulut ninting maya.
Pekara bukai ke meseti dikemerat iya nya suah masu jari, nukang jenila rumah ngambika angin sereta panchak matahari seruran tama ketegal chara tu ulih ngurangka penyampau virus ba dalam rumah.
Semua kain tilam, pua sereta sarung bantal enggau pekayan orang sakit meseti dicuci enggau sabun penuchi gari lalu dijembui ba baruh panchak matahari.
Meresa Tikas Oksigen Dalam Darah
Dikena ngemudah atur ngintu tauka meresa pengerai tubuh diri di rumah, Dr Boo meransang sida meli ‘Pulse Oximeter’ iya nya siti perengka dikena nentuka tikas oksigen dalam darah.
Ku iya, ‘Pulse Oximeter’ tu ulih dibeli ba farmasi alai perengka tu dikepit ba jari tunjuk tauka jari antu.
Ungkup anak mit tau dikepit ba tunjuk kaki.
Nitihka penerang Dr Boo, peresa tu meseti digaga enda kurang ari 3 kali sehari alai tikas oksigen darah normal iya nya entara 95-100 peratus.
Enti tikas oksigen baruh ari 94 peratus, orang sakit meseti madah ngagai Klinik Pengerai, lutur CAC, spital tauka betelefon ngagai lumur 999 ngambi tau diperubat enggau lengkas.
Orang sakit mega dilalau ngaga exercise sekali sehari sereta ngerikut tikas kedap seput enggau tikas oksigen darah sebedau sereta pengudah exercise.
Kelimpah ari nya ku penerang Dr Boo, enti tikas oksigen darah nurun 3 peratus tauka lebih pengudah exercise, orang sakit meseti nganjung diri berubat ngagai spital enggau lengkas laban nya tanda lempuang enda manah.
Orang sakit mega meseti nganjung diri berubat enggau lengkas enti tikas kedap ngelui ari 100 seminit tauka baruh ari 60 seminit.
Nerang agi enggau silik, Dr Boo madah bisi 2 pekara ti ngasuh kedap jantung kelalu laju, kelalu lubah tauka enda manah.
Kurang oksigen ba dalam darah ngujungka reflek jantung nyelai ari iya ke suah ti ketegal bisi infeksyen ba lempuang.
Ku Dr Boo, kurang oksigen darah enggau virus Covid-19 tau ngujungka tisu jantung rusak.
Ketegal nya enti bisi pedis ba dada tauka kedap jantung nyelai ari ke suah, meseti nganjung diri berubat enggau lengkas.
Ke penudi Dr Boo ngelalau, enti pengangat tubuh manggai 37.5 Celcius tauka ngelui ari nya tauka bisi tabin lebih ari 2 hari, meseti nganjung diri berubat enggau lengkas. — DayakDaily
