SIBU, April 26: Pengawa Bepilih Besai Ke-14 (PRU14) di Parlimen Kapit dipeda majak angat lebuh siku agi chalun ari penyakal deka dibantaika nyatup penyandang, Datuk Alexander Nanta Linggi.
Ke pemadu baru siku ex-Soldadu Tasik, Sai Malaka, 53, udah dibantaika Presiden Parti Reformasi Negeri (STAR) Sarawak Lina Soo, ngarika parti nya ba parlimen Kapit .
Ku Sai, iya pinchin ari Soldadu Tasik Diraja Malaysia dalam taun 2009 lalu nyadi kaban Parti Progresif Penduduk Malaysia ketika maya diau di Johor.
Asal ari Katibas, Song, iya mangku pengawa nyadi Presiden Gagasan Dayak Iban Bersatu (GAIU) di Johor ba taun 2012.
“Aku pulai kitu dalam taun 2016 lalu beratika peranak Sarawak patut ngubah runding politik sida ngambika ulih ngasaika tikas pemansang ke manah agi,” ku iya madahka juluk politik diri.
Sai menyadi tuai chalun DAP ba kerusi Parlimen Kapit maya PRU13, Ramli Malaka, ti alah laban Nanta nengah majoriti 9,731 undi.
Kena Hari Enam nyin tadi, DAP Sarawak Chong Chieng Jen mantaika Paren Nyawi, 37, ngarika chalun nya nyatup Nanta.
Paren, ari Rumah Jarop di Song, ngembuan ijazah sarjana muda perakaunan ari Universiti Teknologi Mara (UiTM), Shah Alam. Iya gawa nyadi juruaudit pengelama 10 taun di Kuala Lumpur sebedau nyeretai DAP dalam taun 2015 serwta ngelengk pangku pengawa lalu bediri minta pilih ba pengawa bepilih negeri ba taun 2016.
Iya nyatup Datuk Ambrose Blikau Anak Enturan ari Barisan Nasional (BN) ba kerusi Kunsil Negeri Katibas, tang alah nengah majoriti 3,053 undi.
Paren diripot napi pemar deka ngalahka Nanta, taja pia nguji naka ulih ngurangka majoriti undi Nanta laban ku iya, juluk nya nyadi nyata nyema rwbak biak bisi pulai ngundi.
Nanta ngenanka kerusi Kapit ba taun 1999 nemgah 12,157 undi nyatup chalu Ngatika Diri, Richard Nujong Abit ke bulih 1,141 undi, lalu menang darat maya PRU 2004 enggau 2008.
Pengudah menang ba pengawa bepilih besai 2013, Nanta dichiri nyadi Sapit Menteri Pemansang Menua Pesisir enggau Kandang Menua dalam Kabinet baru Menteri Besai Datuk Seri Najib Tun Razak.
Ku Nanta, majoriti ke besai beguna amat ke Sarawak ngambika ngembuan sada ke tegap agi ba peminta sereta dikemeratka Putrajaya.
Majoriti ke besai agi mega deka nentuka pemujur Ejensi Pemansang Hulu Rajang (URDA), ti deka ngerembaika pemansang di sitak nya ti mungkur pemesai 38,000 kilometer persegi di Kapit, Hulu Rajang, Kanowit enggau sebagi ari Bintulu, ku iya. — DayakDaily
