Najib ketuai ti berat sereta siruka rayat — Nanta

Datuk Alexander Nanta Linggi

SONG, April 11: Penyuah Menteri Besai Datuk Seri Najib Tun Razak nemuai ke Sarawak nyadi kelai iya siku ketuai ti berat sereta siru rayat di negeri Bumi Kenyalang, ku Sekretari Besai Parti Pesaka Bumiputera Bersatu (PBB), Datuk Alexander Nanta Linggi.

Nya beduduk udah 61 kali nemuai kitu kenyau nyadi menteri besai dala taun 2009, Najib amat meretika peneka rayat Sarawak.

“Nya kebuah kitai patut ngetanka iya nyadi ketuai megai perintah di menua tu (ba pengawa bepilih besai ke-14),” ku iya.

Ku iya, tu bebida enggau Tun Dr Mahathir Mohamad ti jarang amat nemuai ke Sarawak sekumbang 22 taun nyadi menteri besai.

Nanta ke mega Sapit Menteri Pemansang Memua Pesisir enggau Kandang Menua madah munyi nya ba Pengerami ‘Kasihi Pekebun Kecil’ Renggat Kapit enggau Seminar Pemansang Sosioekonomi Ketuai Raban Bansa enggau Ketuai Bansa di Daerah Song ditu.


Bisi 295 iku pekebun mit, ketuai raban bansa enggau ketuai bansa ngulu pengerami ke diatur Risda enggau Opis Pelilih Song nya.

Bekaul enggau manifesto BN negeri ti dilancharka Kepala Menteri Datuk Patinggi Abang Johari Tun Openg empai lama, Nanta madahka nya ukai semina jaku puang.

Ambika chunto, Agensi Pemansang Ulu Rajang (URDA) ke mantau pemansang bakqndang menua nya mega dipasuk dalam manifesto nya ti dengan ngambil kira pengingin rayat ba kandang menua nya, ku iya.

“Semua bansa pemansang deka dilangkar nitihka guna rayat lalu ukai bepelasarka perambu erinah aja,” ku iya. — DayakDaily

Share this article!