Najib dekaka penyarut SUPP, UPP diputar sebedau PRU14

Menteri Besai Datuk Seri Najib Tun Razak

KUCHING, Dis 24: Menteri Besai Datuk Seri Najib Tun Razak dekaka penyarut entara Parti Sa,ati Rakyat Sarawak (SUPP) enggau repik parti nya Parti Rakyat Bersatu (UPP) diputar sebedau Pengawa Bepilih Besai ke-14 (PRU14).

Iya ke mega nyadi chairman Barisan Nasional (BN) menua pechaya Kepala Menteri Datuk Patinggi Abang Johari Tun Openg bisi formula dikena mutarka pekara nya.

“Aku minta pekara tu diputarka. Aku pechaya Abang Johari bisi formula mutarka tu sebedau PRU14 ngambika SUPP pulai nyadi rintai ke tegap lalu nyadi siti parti aja,” ku iya.

Iya bejaku munyi nya lebuh nutup Gempuru Pengari Tiga Taun Sekali SUPP ke-24 di Kuching pagi kemari. Sama bisi datai Abang Johari ke mega chairman BN Sarawak enggau Presiden SUPP Datuk Dr Sim Kui Hian.

Dulu ari nya Dr Sim lebuh ke bejaku madahka pengari setuju enggau resolusi ‘ngenggaika chalun terus BN’ ba PRU14 ila.


Najib lebuh ke bejaku ba mua pengari ke bisi datai dekaka SUPP nyadi sebuah parti ke dipilih di Sarawak baka ke sebedau tu.

Ku iya dibanding enggau gempuru tiga taun ke sebedau tu, sekali tu iya bisi ngasaika SUPP udah ngembuan ‘penyerakup ke majak tegap’.

“Aku berasai lantang amat ati sehari tu, keterubah laban nyauka semua pengari ke bisi datai ngena baju bechura kuning kelai penyerakup sereta pemaru SUPP ti tegap.

“Aku dekaka SUPP nyadi parti dipilih rayat Sarawak sama baka Parti Pesaka Bumiputera Bersatu (PBB) enggau ke bukai ti endang asal ari negeri tu,” ku iya.

Najib mega bisi ngerintaika tiga pekara ti tau nyadi pengering SUPP.

“Tiga pekara iya nya ngembuan perambu lalu perambu nya ulih dipejalaika enggau manah sereta mega penyerakup enggau gempung ,” ku iya.

Menteri Besai nya mega madahka pemeri 50 peratus belanja ungkup duit turu mikro deka dipejalaika SUPP.

“Aku meri 50 peratus, berapa penyampau nya ila kitai berundingka nya, 50 peratus agi deka diberi ngagai perintah negeri.

“Bekaul peminta Dr Sim lebuh ti dekaka Sekolah Jenis Kebangsaan Cina Bako, Kuching dipindahka, saku mega ngemendarka nya,” ku iya. — DayakDaily