Nadai pekara berat dikerandau lebuh Anwar nemuai ngagai aku — Abg Johari

Datuk Patinggi Abang Johari Tun Openg

KUCHING, Sept 11: Kepala Menteri Datuk Patinggi Abang Johari Tun Openg sentang penemuai Penyanding Penemu Parti Keadilan Rakyat (PKR) kena Hari Enam minggu nyin tadi.

Lebuh ditanya pemberita sentang pekara nya, iya madahka Datuk Seri Anwar Ibrahim semina nemuai aja.

Nya meh keterubah endar kedua-dua ketuai nya betemu kenyau Anwar dilepaska ari Jil Sungai Buloh beberapa bulan ke udah.

“Kami nadai berandauka pekara ti berat,” ku Abang Johari tembu ngemataka pengawa nyain Sempekat Pemereti Ati (MoU) entara Perbadanan Pembangunan Ekonomi Sarawak (SEDC) enggau Foshan Feishi Automobile Manufacture Co Ltd China ngambika mekal bas hidrogen kena Hari Satu tu tadi.

Anwar mega bisi nemuai meri basa ngagai Tuai Megai Menua Tun Pehin Sri Abdul Taib Mahmud di Demak Jaya.

Berebak enggau nya, Anwar kebuh ke ditanya media sentang penemuai iya ngagai Abang Johari, iya ngaku randau nya fokus ngagai pekara ti dikemeratka negeri tu enggau pengelantang pendiau rayat.

Anwar dipelaba bediri ba pengawa bepilih mit Oktober tu dikena iya nyendiaka diri nyadi Menteri Besai dalam timpuh urung dua taun agi, lebuh Tun Dr Mahathir Mohamad nyurutka diri.

Pakatan Harapan sebedau pengawa bepilih besai ke sebedau tu udah setuju ngambika Anwar dichiri nyadi Menteri Besai kelapan. — DayakDaily