JAKARTA, Jun 30: Malaysia enggau Indonesia kemari, sama setuju deka ngelaban kimpin negatif Eropah bekaul industri minyak sawit.
Menteri Besai Tun Dr Mahathir Mohamad, madah nyadi pengeluar besai komoditi nya, Malaysia enggau Indonesia meseti bekerejasama ngelaban kimpin ti dipejalaika Eropah bejai industri menua.
“Eksport minyak sawit diatu napi pemar ketegal Eropah lalu kitai meseti sama ngelaban jaku sida ti madah kenu ku mayuh kampung diperimba ke meri pangka besai ngagai gaya hari enggau rampa menua,” ku iya dalam aum media begulai enggau Presiden Indonesia, Joko Widodo, di Istana Presiden Bogor, ditu.
Ku Dr Mahathir, bantah Eropah nya dipeda lebih ngagai ekonomi lalu ukai pangka ba rampa menua ketegal nguna tanah alai nanam sawit.
Ku iya, enti bekaul rampa menua, menua Eropah pengamai iya nadai agi kampung laban kesemua nya udah ditebang.
“Enti kitai begunaka palan nanam sawit ke lebih besai, sida mantah,” k iya.
Berebak enggau nya, Jokowi minta perintah Malaysia berundingka pinta Indonesia nyendiaka sekula ngagai anak pekereja ari menua nya di Semenanjung Malaysia sereta di Sabah enggau Sarawak.
Iya mega bisi nyebut pasal pematut ngaga kerejasama rat mutarka isu bekaul garis entara menua enggau sama ngeluarka kerita. — DayakDaily
