MRSM keempat Sarawak deka digaga di Bintulu

Datuk Alexander Nanta Linggi

KUCHING, Mac 18: Sarawak deka ngaga Maktab Rendah Sains MARA (MRSM) ke diberi nama MRSM Petronas di Bintulu, pia ku Sapit Menteri Pemansang Menua Pesisir enggau Kandang Menua, Datuk Alexander Nanta Linggi.

Bejaku lebuh bejadi EduXtra 2018 renggat negeri kemari, iya madahka MRSM Petronas ulih dikena manggai ba taun by 2021.

“Enti MRSM Petronas udah tembu, nya deka nyendiaka peluang ngagai raban biak Bumiputera di Bintulu ngulih pelajar ke bekualiti sereta neeenak pengerkndu sida dalam bidang Sains,Teknologi, Kejuruteraan enggau Matematik (STEM),” ku iya lebuh bejadi program pengelama dua hari nya ke diatur ba The Hills Shopping Mall ditu.

Tiga buah Kolej Menengah Sains Mara ke bisi diatu iya nya MRSM Kuching, MRSM Mukah enggau MRSM Betong.

MRSM Kuching bisi nyendiaka program ‘International General Certificate of Secondary Education’ (IGCSE) lalu MRSM Mukah enggau MRSM Betong bisi nyendiaka program Setipikit Pelajar MRSM ungkup bala nembiak.


Ku Nanta, MRSM ngembuan juluk nyikap bala nembiak enggau pelajar ke bekualiti ngambi setipak enggau standard dunya. MARA Sarawak udah melanja RM957,184 dikena ngatur 55 bengkah program dagang ba mayuh bengkah kluster taun siti nyin tadi. Urung 2,000 iku orang dagang udah bulih pemaik ari 55 bengkah program nya.

Nengah opis menteri iya ku Nanta, MARA deka majak mantu orang dagang ba mayuh bengkah bidang ngambika sida ulih ngemansang sereta ngerembaika dagang sida.

“Aku bisi dipadah ke alai MARA Sarawak udah nyendiaka 365 lot endur bejual ngambika disuwa ngagai bala orang dagang.”

Taun siti nyin tadi ku iya, lebih RM17 milion udah diagih ngagai 200 iku orang dagang ke nyadi bantu belanja dikena ngemansangka dagang sida.

“Tu mandangka MARA semampai sedia mantu orang dagang di Sarawak lalu majakka ngambika engkeman belama ,” ku iya.
Nanta ngarapka bala nembiak, kelebih agi ti udah nerima pemutus Sijil Pelajaran Malaysia (SPM) sida enggau apai indai sida, ulih ngawakka diri ngulu karnival pelajar nya.

Ku iya, EduXtra nyendiaka platform ke pemadu manah ngagai sida nyerungkai peluang belajar ke pemujur pengidup sida jemah ila. — DayakDaily