KUCHING, Nov 22: Orang bekebun sawit enggau lada di Tuba, Pantu minta Perintah Besai nengah ijinsi ke bekaul nikika rega komoditi nya.
Kenyau rega sawit enggau lada balat nurun dalam timpuh 3 taun ke udah, penatai pemisi orang bekebun ke tebal agi nguwan kandang menua pesisir balat merinsa.
Pekara nya meri empas ba pengidup sida kelimpah ditambah enggau rega barang di pasar ti majak niki.
Penyuntuk ari sukut belanja nya bela meri penanggul ngagai sida ngintu kebun (sawit enggau lada) alai baja, racun meseti dibeli tiap bulan.
Tuai Rumah (Tr) Mansur Geranting, Tuba Tengah di Pantu lebuh dirandau bedau lama tu tadi ngarap Perintah Besai ulih mantu nikika rega kededua komoditi nya.
Ku iya, tebal agi peranak di Tuba lalu pia mega peranak ke nguwan kandang menua pesisir di serata Sarawak bekebun sawit enggau lada.
“Tu meh penatai pemisi kami ke nguwan menua pesisir. Dalam timpuh 3 taun ke udah, penatai pemisi kami ditu balat kurang.
“Ditambah enggau rega barang di kedai ti udah niki, bala anak agi begunaka belanja besekula.
“Kami udah lama ngenatka diri lalu ngarap perintah mantu,” ku iya.
Meretika tanggungpengawa ke bekaul enggau sawit sereta lada dipegai Perintah Besai, Tr Mansur minta MPOB enggau Lembaga Lada Malaysia (LLM) mantu orang bekebun mit baka sida di Tuba.
Ba taun 2016 suba ku iya nambah, rega sawit manggai RM8 sekilo tang diatu udah jauh labuh nyentuk ngagai RM3 sekilo.
Nengah rega nya, belanja minyak nyual sawit ke gudang pan enda umbas, tandu iya.
Penemu Tr Mansur bela disukung bala tuai rumah bukai ke diau ngelingi Tuba, Pantu.
Entara sida iya nya Tr Jantan Gendup (Tubai Ili), Tr Gura Empulu (Tuba Sekula) enggau Tr Saripah Rit (Tuba Ulu).
Bedau lama tu tadi, Sapit Kepala Menteri Datuk Amar Douglas Uggah netapka Perintah Negeri enda deka ngelakka orang bekebun merinsa ketegal rega komoditi ke majak labuh nya.
Ku iya ke mega Menteri Betanam Betupi Moden, Tanah Adat enggau Pemansang Kandang Menua, perintah deka meri bantu baja sereta input betanam betupi ke bukai ngambika orang bekebun ulih ngintu kebun sida.
“Aku enda madah bantu tu chukup tang dikearap ulih ngurangka pemerinsa ke ditapi orang bekebun.
“Enti penatai pemisi sida kurang, pekara nya mai empas ba ikas pengidup sida,” ku Uggah ba sebengkah pengerami di Rumah Linggie, Sg Lait, Betong. — DayakDaily
