KUCHING, Ogos 6: Raban nembiak rebak baru diperansang terus meretika sejarah menua Malaysia, ku Menteri Muda Nembiak enggau Lumba Datuk Snowdan Lawan.
Dirandau pemberita pengudah ngelanchar program Kimpin Ngibar Jalur Gemilang 2019 enggau Konvoi Kembara Merdeka pagi tadi, Snowdan madah pemereti ba pekara nya berat ngambi ulih nentuka Malaysia seruran likun.
“Semengat talukka menua (Malaysia) meseti tegap ba diri tetiap iku kitai.
“Raban nembiak baru diperansang meretika sejarah menua, ukai semina sejarah Tanah Melayu aja, tang pia mega sejarah ke nyadi di Sarawak,” ku iya.
Snowdan pechaya kimpin ngibar Jalur Gemilang enggau konvoi kembara merdeka ke diatur ninting taun ulih nyaup ngiri semengat talukka menua ba diri tetiap iku peranak Malaysia.
Nengah kimpin ke diatur ku iya, rayat negeri tu ulih mandangka penyerakup begulai enggau pangan diri.
“Kitai sama bela ngibarka Jalur Gemilang ketegal kitai diau ba siti menua.
“Kitai meri basa ba Hari Merdeka enggau Hari Malaysia lalu mandangka penaluk ati ba menua diri,” ku iya.
Ba program nya pagi tadi, Snowdan nerima Jalur Gemilang ari Kaban Parlimen Bandar Kuching, Dr Kelvin Yii, ti nguluka pejalai konvoi ti ngejang ari Opis Pemadah Malaysia (Sarawak) di Jalai Diplomatik.
Konvoi 15 iti entuka nya deka bejalai penyauh 26 km mansa Jalai Astana, Jalai Kulas, Jalai Hj Taha, Waterfront Kuching, Jalai Abell, Jalai Padungan, Jalai Pending, Jalai Tun Salahhudin sebedau pulai ke JaPen Malaysia.
Program ke sama mega deka diatur di 33 bagi menua di Sarawak nyentuk ngagai 19 September, 2019. — DayakDaily.
