PUTRAJAYA, Mei 19: Menteri Besai Singapura Lee Hsien Loong betemu enggau Tun Dr Mahathir Mohamad ditu sehari tu, ketuai ASEAN kedua nemuai ngagai menteri besai baru nya pengudah Pakatan Harapan menang ba pengawa bepilih besai kena Mei 9.
Seduai betemu ba Yayasan Kepimpinan Perdana (PLF), endur Dr Mahathir bejalaika pengawa iya maya tu.
Sultan Brunei Sultan Hassanal Bolkiah nyadi ketuai ASEAN yang keterubah nemuai ngagai Dr Mahathir, kena Hari Satu tu tadi.
Lee enggau raban iya datai pukul 11 pagi, richah disambut raban pemberita menua tu enggau antarabansa ti udah betatam ba pintu penama PLF kenyau ari Mei 10.
Penatai Lee ba lobi PLF disambut Dr Mahathir.
Dr Mahathir, 92, ngangkat sumpah nyadi menteri besai ketujuh Malaysia pengudah mujur nguluka gempung Pakatan Harapan besai ba Pengawa Bepilih Besai ke-14, ke alai iya lalu nyadi menteri ke pemadu tuai di dunya.
Kena Hari Tiga tu tadi, Lee ba aum Parlimen Singapura madahka diri deka nemuai ke Malaysia betemu enggau Dr Mahathir.
Iya baka ke diripot Channel NewsAsia gagit sekali agi bekerejasama enggau Dr Mahathir ke pemaik semua.
Ku Lee, Singapura mega udah bekerejasama enggau Dr Mahathir sereta sekeda raban tim iya ke bukai nembuka sekeda projek nyengkaum Link Kedua di Tuas, dalam timpuh Dr Mahathir agi nyadi menteri besai suba.
Dr Mahathir nyadi menteri besai Malaysia ari taun 1981 nyentuk 2003. — DayakDaily
