Mawan agi keran deka ngenanka kerusi Saratok

Tan Sri William Mawan Ikom

SARATOK, Feb 27: Kerusi Sararok dijangka ‘angat’ ba Pengawa Bepilih Besai Ke-14 (PRU14) tu ila laban penyandang Tan Sri William Mawan Ikom deka majak ngetanka kerusi ti dimenang iya nengah tiket SPDP ba taun 2013.

Taja pia, Mawan ke mega Chairman Lembaga Lada Malaysia (MPB) numbuhka Teras lalu nyadi Presiden parti nya ba taun 2014.

Nyerumba PRU14, Parti Demokratik Progresif (PDP), nama baru Parti Demokratik Progresif Sarawak (SPDP) nuntut kerusi nya diserah ngagai sida.

Presiden PDP, Datuk Seri Tiong King Sing diberita ngembuan tiga chalun ti tau disabung ngetanka kerusi Saratok.
Chalun PDP nya nyengkaum siku orang dagang Subeng Mula enggau Basil Thomas sereta siku lutur perubat, iya nya Dr James Chela.

Taja pia, Mawan enda mantul ati tang dipeda majak gawaka rayat ngichaka iya mengkang dichalun ba PRU ila.

Mawan ke mega Kaban Kunsil Negeri Pakan dipeda enggai nyerah alah taja pan bedau temu bagi parti ti diarika iya.
Presiden PDP kena tengah bulan November suba madah deka nentuka ‘kuota’ empat kerusi Parlimen ti diungkup ngagai parti nya deka ditanka maya PRU14.

Kelimpah Bintulu, tiga iti agi kerusi Parlimen PDP iya nya Baram (Anyi Ngau), Mas Gading (Anthony Nogeh Gumbek) enggau Saratok (Mawan).

“Bekaul enggau penuduk Parlimen Saratok, nya diempu kitai. Sentang penuduk iya (Mawan), awak Kansil Majlis Tetinggi PDP ngaga pemutus sentang nya,” ku iya bejaku ba November suba. — DayakDaily