Masing: Pemansang datai di Kapit, badu nuduh sengapa

Abang Johari (lima ari kanan) ba penemuai kereja ke Jematan Mujong. Bela dipeda Masing (empat ari kanan).

Dikarang Chris Bishop

KAPIT, 5 Okt: Raban orang ke suah nuduh bala pengari rakyat menoa Kapit enda mai pemansang dilalau ngetuka ulahnya.

Sapit Kepala Menteri Tan Sri James Masing madah, sida patut udah meda sereta meretika pemansang ke udah digaga perintah.

Ku Masing, pemansang nyata dipeda diatu alai Kepala Menteri Datuk Patinggi Abang Johari Tun Openg ulih bemutusikal ari Sibu datai ba Nanga Mujong.

“Kami pengari rayat nyengkaum (Datuk) Alexander Nanta (MP Kapit), (Datuk) Wilson Ugak (MP Hulu Rajang), Wilson Nyabong (ADUN Pelagus), Jefferson Jamit (ADUN Bukit Goram) disebut enda mai pemansang ba Kapit.


“Enti deka datai ba Nanga Mujong ditu, meseti nengah jalai alai kitai deka nengah Jematan Baleh ke beungkus RM87 juta.

“Retinya kitai meseti nengah jalai ke digaga Perintah, tang bisi sekeda madah nadai pemansang ke dibai bala pengari rayat ditu,” ku iya.

Masing mansutka jaku nya ba program Penemuai Kereja Abang Johari ke palan ngaga Jematan Mujong ditu, seharitu.

Masing ke mega ADUN Baleh nambah, raban orang ke sengapa nuduh mega udah mansa jalai enggau jematan nya.

“Raban tu udah nengah Jematan Baleh, Jematan Mujong sereta Jematan Banyau alai udah nya sida madah ke orang Sarawak nadai pemansang ba menua Baleh.

“Ni jalai ke ditengah sida deh? Kada enda sida terebai. Nama di tengah sida meraka Sungai Baleh, Mujong enggau Banyau enti nadai jematan?

“Retinya bisi pemansang, anang nundi rayat. Rayat bisi mata ulih meda, bisi pending ulih ninga, bisi mulut ulih bejaku,” ku iya.

Berindik enggau nya, Masing ngelalau raban orang ke suah mai tuduh nya badu ngemelika rayat.

Ku iya ke mega Menteri Pemansang Infrastruktur enggau Port, orang Mujong sereta orang Baleh enda beli.

Ngenang kaul ke sama, Masing mega madah Perintah diatu benung ngaga jalai Nanga Mujong nuju Palan Tekat Ai Baleh pemanjai 73 km ti begunaka belanja RM1.2 bilion.

Ku iya, projek nya begunaka timpuh 3 taun alai pengudah nya jalai nuju Sungai Tunoh deka mega digaga.

“Jalai ke disebut tu ukai nya pagi ila lalu tembu digaga, enda pia.

“Projek begunaka timpuh, besabar meh kitai nganti,” ku Masing. — DayakDaily