KUCHING, Nov 8: Sapit Kepala Menteri, Tan Sri Dr James Jemut Masing ngarapka bajet ti dipejurai Kepala Menteri Sarawak, Datuk Patinggi Abang Johari Tun Openg pagi terus fokus ngagai pemansang menua pesisir, taja pan diatu iya bebendar deka ngemodenka Sarawak nengah chara ngenegapka ekonomi digital enggau teknologi hidrogen.
Ku Masing ungkup Kapit, Perintah Besai udah meri bajet dikena ngaga Projek Tekad Ai Baleh enggau jalai nuju tekad ai nya.
“Taja pia kitai tetap deka nentuka jalai besemak enggau garis entara menua ke diperambu senedau tu digaga ngambika ulih nyambung ngagai tekad ai di pesisir baka Tekad Ai Bakun, Murum enggau Baleh.
“Tu beguna amat enggaika tekad ai kitai bisi dikeruga lalu nengah jalai nya, kitai ulih nganjung raban pengelikun ngagai palan nya enggau jampat nyema bisi nyadi penusah ngenyit kelimpah numbuhka pos penyaga pengelikun,” ku iya.
Tekad ai nya ukai semina mekal kuasa karan ke negeri tu aja tang mega ke eksport ngagai menua luar sereta dikemansang nyadi pemansut ai beresi dikena mutarka penanggul ai ba kandang tengah enggau tebing pantai Sarawak, kelimpah dikena ngemansangka teknologi hidrogen baka ke dipadah Kepala Menteri kemari, ku iya.
Abang Johari deka bejuraika bajet Sarawak sehari tu ke alai 70 peratus ari nya deka fokus ngagai pemansang lalu laluh 30 peratus nya ungkup operasi. — DayakDaily
