Dikarang Chris Bishop
KUCHING, Jun 24: Manggai taun 2030, Projek Koridor Kuasa Dikena Baru Sarawak (Score) deka nyendia 1.6 juta peluang kereja ungkup peranak Sarawak.
Berindik enggau nya, Sapit Kepala Menteri Tan Sri James Masing netapka bala graduet Palan Pelajar Tinggi (IPT) enggau ari Palan Latih Pelajar Teknikel Vokasyenal (TVET) dijamin bulih kereja.
“Maya projek tu nyapai juluk ke ditetap manggai 2030, palan Score deka nyendia 1.6 juta peluang kereja baru ngagai peranak Sarawak.
“Tu berita manah ngagai pelajar IPT enggau TVET alai sida deka dijamin peluang kereja pengudah nembuka kus,” ku iya.
Masing mansutka jaku nya ba Malam Randau Begulai enggau Pelajar Dayak IPT Sarawak 2019 di Dewan Tan Sri Aziz, Kolej I-CATS(Kampus Barat) Jalai Stampin Timur ditu, malam tadi.
Kelimpah ari nya, pelan pemansang Score ku Masing dengan mai urung RM334 biliun puku ari menua luar diperanak ditu.
Ngenang kaul ke sama, Masing ke mega Menteri Pemansang Infrastruktur enggau Pengangkut madah Perintah Sarawak meratka pelajar TVET sereta keran ngenegapka pelajar Sains, Teknologi, Engineering enggau Matematik (STEM).
Kededua bengkah pelajar nya berat ngambi ulih nempa mudal mensia ti ulih nyukung inisiatif pelin pemansang nengeri.
Tambah Masing, atur perintah ti ngalih ngagai ekonomi digital begunaka mudal mensia ke landik sereta bepenau seraris enggau pinta mayuh bengkah industri diatu enggau jemah ila.
“Pemansang teknologi nyengkaum pengerembai Industri 4.0 enggau Ekonomi Digital begunaka mudal mensia ti ulih nangkup pinta industri menua,” ku Masing.
Program Randau malam nhya diatur Komiti Pengari Pelajar i-CATS lalu matak pelajar Dayak ari IPT Perintah enggau Pribit.
Randau ngundang tiga panel iya nya Menteri Muda Nembiak enggau Lumba Datuk Snowdan Lawan, Sekretari Politik (Kepala Menteri) Datuk Seri Doris Brodie enggau Direktor Konsortium Bumi Consultants, Datuk Ir Janang Bungsu.
Program diatur enggau tuju ngerapi kaul entara pelajar Dayak kelimpah besilih penemu sereta penau dalam mayuh bengkah bidang pelajar.
Bela datai Menteri Muda Industri enggau Beranakka Puku Malcolm Mussen, Adun Pelagus Wilson Nyabong enggau Ketuai Direktor Eksekutif i-CATS Mohd Isham Fauzi. — DayakDaily
