KUCHING: Sapit Kepala Menteri Tan Sri James Masing enda pechayaka Pakatan Harapan (PH) ulih meri lima batang pekara baru ti dikedekaka Sarawak.
“Enti (Tun Dr) Mahathir (Mohamad), Anwar (Ibrahim) enggau Lim Kit Siang dalam PH aku enda pechaya enggau jamin ke diberi sida.
“Kelimpah Mahathir, Anwar enggau Lim Kit Siang dini (PH) sebedau tu? Nama utai udah digaga sida ke Sarawak? Nadai,” ku iya.
Ku iya, PH tauka bala ketuai parti penyakal nya nadai kala berubah ulah ngagai Sarawak enggau Sabah.
Iya madah munyi lebuh dipinta ngenag pasal lima batang pekara baru ti deka diberi ngagai Sarawak enggau rayat Sarawak ti dibacha Chairman PH Sarawak ke mega chairman Parti Tindakan Demokratik (DAP) Sarawak Chong Chieng Jen ba PH di BDC ditu, malam Hari Minggu nyin tadi.
Taja pia, Masing ke mega Menteri Pemansang Infrastruktur enggau Petengka Pengangkut setuju nengah lima batang pekara baru ti disemaya nya, PH nemu kedeka Sarawak tang endaulih ngamatka nya.
“PH nemu utai dikedeka Sarawak, tang aku enda pechaya PH dapat ulih ngamatka nya,” ku iya.
Dulu ari nya Tun Dr Mahathir ke nyadi Chairman PH Pusat nyerahka lima batang pekara baru nya ngagi Chong ngambika dibacha ba mua beribu iku penyukung enggau rayat Sarawak.
