Manyin balat dipejah ketegal madahka pengajar Sarawak nadai kualiti

Cobbold John

SRI AMAN, Nov 5: Presiden Parti Bansa Dayak Sarawak Baru (PBDSB) Cobbold John Lusoi enda setuju enggau penemu Menteri Pelajar, Sains enggau Pansik Teknologi Dato Sri Michael Manyin ba sentang kualiti pengajar Sarawak.

Ku iya, Manyin siku ari Menteri lalu patut nyaga kuasa autonomi pelajar bepelasar ka Sempekat Malaysia (MA63).

“Pekara pelajar siti ari kuasa autonomi ti patut dipulaika baru ngagai Sarawak lalu tu meri awak Sarawak ngatur polisi pelajar ke lebih manah agi,”ku Cobbold.

Penemu ti dipansut Manyin ti madah pengajar Sarawak nadai kualiti balat nerima pejah mensia mayuh kelebih agi raban pengajar di menua Sarawak.

Ba sebengkah pengerami di Kuching, Manyin madah pengajar Sarawak agi bedau ngembuan kualiti ti chukup lalu agi mayuh pengajar ari Semenanjung Malaysia deka diambi dikena ngisi kuota.


“Niang Pehin Sri Adenan Satem suba bebendar ngetanka hak Sarawak lalu kala bejaku madah tiap kali menteri pelajar berubah sistem pelajar pan lalu deka diubah.

“Nya alai, anang nuduh pengajar kurang kualiti, tang menteri nya empu ti ngerusak sistem pelajar,” ku Cobbold

Berindik arinya, Cobbold minta Manyin meri penerang ke nyemetak bekaul enggau isu pengajar ti dikumbai iya nadai kualiti.

Iya mega minta Manyin mantai ka langkar polisi pelajar ti dibaruh kuasa Manyin bekaul enggau isu pengajar interim. — DayakDaily