Manred ngagihka RM265 juta dikena ngangkat tikas pengidup orang bekebun, ku Uggah

Uggah (bediri) bejaku ngagai bala mayuh ba Jerayawara GPS DUN Bukit Saban renggat Ranting Rimbas Tengah kemari.

KUCHING, 26 Julai: Perintah Sarawak nengah Opis Menteri Betanam Betupi Moden, Tanah Adat enggau Pemansang Menua (Manred) ngagihka RM265 juta ungkup sektor betanam betupi.

Sapit Kepala Menteri ke mega Menteri Manred Datuk Amar Douglas Uggah Embas madah, agih belanja nya dikena mantu ngangkatka tikas pengidup orang bekebun.

“Nengah agih belanja tu, kitai ngarap ulih meransang orang bekebun nanam mayuh agi produk baka ke sayur ke bisi potensyel kelimpah ari bekebun lada, getah enggau sawit,” ku Uggah.

Iya mansutka jaku nya rambau ngelanchar Jerayawara Gabungan Parti Sarawak (GPS) DUN Bukit Saban renggat Ranting Rimbas Tengah kemari.

Uggah nambah, Manred deka ngerembaika potensyel makit ekspot asil betanam betupi pengudah palan penerbai bilun Spaoh tembu digaga jemah.

Iya ke mega ADUN Bukit Saban madah nyauka semua rumah panjai di kandang endur nya udah digaga jalai alun, bekal ai enggau bekal lektrik.

Ku iya, Perintah GPS deka seruran ngatur program pemansang lalu ngemujur semua janji ke diberi ngagai rayat.

“Pekara pelajar mega siti pekara ke berat alai kitai deka nyendia latih ke engkeman ungkup raban nembiak ke bedau bisi batang pengawa,” ku iya.

Nitihka penerang Uggah, program jerayawara deka terus diatur ngambi ulih dikena mandangka lambang GPS ngagai tetiap rumah panjai kelimpah ti nerangkan ngagai rayat sentang program pemansang ari perintah.

Ba program ke sama, MP Betong Datuk Robert Lawson Chuat ngarap rayat di Bukit Saban terus meri sukung ngagai Uggah alai iya sigi udah mai mayuh pemansang ngagai kandang endur nya.

Ku Robert, Betong kelebih agi Bukit Saban udah bisi infrastruktur baka ke bekal ai, lektrik, jalai alun sereta sekula.-DayakDaily

Share this article!