KUCHING, Mei 6: Manifesto khas ungkup Stampin ukai semina angan-angan tauka semaya maya pengawa bepilih aja, tang deka dikeamat enti BN menang ba kerusi nya, pia ku chalun BN Parlimen Stampin Datuk Dr Sim Kui Hian.
Ambika chunto baka pengawa dikereja perintah BN di Batu Kawa enggau Batu Kitang dalam timpuh lima taun.
“Dalam timpuh 5 taun bemacham udah digaga kitai di Batu Kawa enggau Batu Kitang tang DAP nadai ngaga nama-nama di Kota Sentosa. Bulih gaji tang enda mantu rayat.
“Enti BN menang kami ngamatka semaya ukai baka DAP ti besemaya aja lalu maya menang pan semima meda aja,” ku iya ba sebengkah licha di Kota Sentosa ke digulu urung dihadiri 900 iku malam kemari.
Nyebut pasal isu royalti minyak ti dibantah penyakal, Dr Sim madah, nengah penumbuh kompeni Petros BN dekaka Sarawak ngempu hak 100 peratus asil minyak enggau gis di negeri tu, tang Pakatan Harapan (PH) semina ngarapka royalti 10 peratus ari Petronas.
Kerusi Parlimen Stampin dianggap ke pemadu angat di Sarawak maya Pengawa Bepilihan Besai ke14 (PRU14) ke alai Presiden Parti Rakyat Bersatu Sarawak (SUPP), Prof Datuk Dr Sim Kui Hian disatup DAP Sarawak Chong Chieng Jen. — DayakDaily
