Malaysia nagit niki ngagai penuduk 10 menua ke pemadu dipilih endur nemuai

Holiday. — DayakDaily.com file pic. // Photo: Pixabay

KUALA LUMPUR, Sept 9: Malaysia nagit niki ngagai penuduk entara 10 palan ke dipilih temuai nyerumba taun 2019, ku Menteri Dagang Temuai, Senian enggau Main Asal, Mohamaddin Ketapi.

Ku iya, beberapa pakara udah dipejalaika opis menteri nya dikena ngelakuka Malaysia nyadi palan ke meseti dilawa lalu deka bejalaika strategi baru dikena nyediaka enviromen ti kondusif ngagai orang ti ngaul diri ba industri tu dikena matak sereta ngerembaika dagang temuai.

“Nyadi juluk kami ngangkatka penuduk menua pengudah dirintai ba penuduk ke-12 ba taun siti nyin tadi. Kitai meseti balat agi besemekih ba renggat entarabansa.

“Kitai mega deka ngaga kerejasama ke manah agi enggau perintah besai enggau perintah negeri ba pengawa ngelakuka Malaysia sereta berandau enggau kompeni penerebai menua tu ngambika ngaga mayuh agi penerebai terus ke Malaysia,” ku iya ba aum pemberita pengudah ngelancharka Matta Fair 2018 di PWTC ditu kemari.

Mohamaddin madah bebekalka peneleba, inovasi, kualiti produk enggau standard servis ke manah, sektor dagang temuai ulih mai menua nyingkang jauh ke mua lalu ngaga Malaysia nyadi sebuah palan ke dipilih temuai. — DayakDaily