TATAU, April 29: Pemutus perintah negeri meri pemendar ngenyit mindahka segera lima sekula ti pemadu berisiko ampuh bah di pelilih tu ngagai endur baru, ngelantangka ati bala pengajar enggau apai indai di menua pesisir tengah Sarawak tu.
Lima buah sekula iya nya Sekolah Kebangsaan (SK) Nanga Penyarai, SK Rumah Keseng, SK Rumah Tayai, SK Nanga Tau enggau SK Kuala Muput ke dalam pelilih Tatau dalam Parlimen Selangau.
Pemesai Opis Pelajar Pelilih (PPD) Tatau, Mohadi Mobin madah ari lima sekula nya, SK Nanga Tau enggau SK Kuala Muput 100 peratus rusak nyengkaum reta enggau infrastuktur ba penusah ampuh bah besai Februari sebedau tu.
“Kena bulan Februari tu tadi, PPD Tatau udah ngenataika ngagai Kepala Menteri (Datuk Patinggi Abang Johari Tun Openg) perambu mindahka lima buah sekula nya ngagai palan ke selamat agi. Perambu nya dipendingka iya (Abang Johari) lalu iya udah ngemendarka perambu nya ” ku iya.
Penusah ampuh bah nya udah ngujungka SK Kuala Muput rugi urung RM1.3 juta lalu SK Nanga Tau urung RM650,000.
Mohadi mega madahka pemutus Abang Johari ke mega Chairman Barisan Nasional nya disambut manah peranak ngelingi tibdeka nentuka anak sida bulih pelajar ke meruan.
“Ke beguna amat, pemutus mindahka sekula ngagai palan ti manah agi ke ulih ngurangka penanggul maya proses belajar enggau ngajar lalu nengah pemisi palan baru tu bala nembiak sekula enggau pengajar ulih ngajar enggau lantang sereta likun,” ku iya.
Ditanya pasal pemandang proses pindah nya, Mohadi madahka peranak menua nya empu merambu palan ke engkeman.
“Kami udah berandau enggau Tuai Rumah sereta peranak menua nya lalu nerima penemu sida endur ke engkeman alai ngaga rumah sekula nya. Kepala Menteri empu dekaka palan baru nya ila ba endur ke tinggi, semak jalai alun, lantang sereta likun endur bala nembiak,” ku iya.
Berebak enggau nya, YDP Gerwmpung Apai Indai enggau Pengajar SK Kuala Muput, Janang Kijun madahka iya enggau bala apai indai bukai ngarapka proses ngemanah sereta mindah ulih dipejalaika naka pengelengkas.
“Kami apai indai ngarapka pengawa mindahka sekula nya ngagai palan ke manah agi ulih nyeliahka proses belajar bala anak kami enda tekachau ketegal ampuh bah,” ku iya. — DayakDaily
