Lim Guan Eng sigi engkeman amat mangku pengawa nyadi Menteri Wang — Masing

Tan Sri Dr James Masing

KUCHING, Mei 13: Keterubah endar Tan Sri Dr James Jemut Masing meri komen ke manah sentang Lim Guan Eng.

Presiden Parti Rakyat Sarawak (PRS) madahka Sekretari Besai DAP ti dichiri mangku penuduk Menteri Wang endang engkeman amat.

Masing ke mega Sapit Kepala Menteri madahka nya mandangka Malaysia ke bendar nyadi sebuah menua ke diuan bemacham pupu bansa.

“Aku pechaya Guan Eng ulih mangku pengawa nya enggau manah lalu ngatur pekara wang menua enggau manah,” ku iya.

Ku iya, ari sukut pemerintah perintah BN pan ngarapka pangku pengawa nya ukai semina dipegai orang Melayu aja.


Kemari, Guan Eng enggai meda pengawa nyiri iya nya dikait enggau pekara bansa lebuh dikerandau pemberita stesen TV ari menua China.

Menteri Pekara Wang ari bansa Cina semina kala dichiri urung 44 tahun ke sebedau tu.

Kemari Menteri Tun Dr Mahathir Mohamad mantaika kelimpah Guan Eng, Tan Sri Muhyiddin Yassin ari Bersatu dichiri nyadi Menteri Dalam Negeri lalu Mohamad Sabu, Presiden Amanah dichiri nyadi Menteri Ngetanka Menua. — DayakDaily