KUCHING, April 3: Opis Asil Dalam Negeri Malaysia (LHDNM) Sarawak udah mujur ngumpul RM5.06 bilion chukai penatai pemisi ba ujung taun 2017 dibanding enggau RM4.79 bilion ujung taun 2016.
Asil ke digumpul nya nambah 5.65 peratus dibanding enggau taun ke sebedau nya.
Ku Ketuai Pegawai Eksekutif LHDNM Datuk Seri Sabin Samitah, nya mandangka penyedar tanggungpengawa madahka penyampau penatai pemisi sereta mayar chukai ke majak manah ba rayat Sarawak.
Bejaku ba pengerami begulai enggau raban media Sarawak di Kuching, Sabin madahka di serata menua, LHDNM udah ngumpul RM123.233 bilion 2017 nambah RM9 bilion dibanding enggau taun 2016.
Sabin mega muji media laban udah mantu nyadung mesej positif ke meri penyedar ngahai mensia mayuh bekaul enggau pemerat mayar chukai penatai pemisi.
Ba pengerami nya, LHDNM bisi mantaika “jingle” ngelaku penyedar pemayar chukai ke deka ditebah nengah di stesen radio dti nyadi bunyi dering nganti kangau tama ngagai semua opis LHDNM. — DayakDaily
