PUTRAJAYA, September 14: Pengilap individu nyadi batang kebuah 1,076,224 MyKad lenyau baka ke diriput ngagai Opis Pengerejista Bansa (JPN) dalam timpuh kurang ari tiga taun kenyau ari taun 2016 nyentuk ke bulan Ogos tu tadi.
Sapit Ketuai Direktor (Operasi) JPN Jasri Kasim madah, bepelasarka statistik opis nya, pengelenyau nya bepun ari pengilap pengempu MyKad ke bisi sepenyampau 820,858 kes, lalu ketegal pengawa jai bisi 242,863 kes sereta penusah ngenyit bisi (12,503).
Taja pia ku iya, kes lenyau nya ngerikod penurun ninting taun, ke alai dalam taun 2016 ngerikod 415,048 kes, taun nyin tadi 390,163 kes lalu naka 31 Ogos taun tu bisi 271,013 kes.
“Pengempu MyKad udah meretika pemesai guna dokumen nya ngagai sida sereta udah beratika peniki penyampau ukum, ti ngasuh sida likun agi naruh MyKad sida,” ku iya lebuh dikerandau pemberita kemari.
Ku Jasri, penyampau ukum ke ditinggang JPN ngagai kes lenyau MyKad berengkah ari bulan Oktober 2015 iya nya RM100 ungkup kes lenyau keterubah, kes kedua (RM300) lalu ketiga (RM1,000) dibanding sebedau nya ke semina RM100 ungkup kes lenyau keterubah, kedua (RM200) lalu ketiga (RM300).
Ku iya ungkup kes lenyau ti ketiga kali kelimpah diukum mata duit, JPN mega deka mansik enggau silik dalam timpuh nyentuk ke 90 hari sebedau MyKad baru dikeluarka.
Ku Jasri baru, ungkup kes lenyau ketegal ari pengawa jai, penusah ngenyit, raban timpang pendiau (OKU) enggau sida ke berumur 18 taun ke baruh, deka diseliahka ari ukum sereta semina dipinta mayar RM10 aja.
Iya mega madah, naka 31 Ogos taun tu bisi 114,215 MyKad baru ke bedau diambi ketegal sekeda kebuah.
Ku iya, entara nya nyengkaum MyKad lama ke diriput lenyau temu baru, nadai awak ngambi, ungkus perengka pengangkut ke tinggi ngagai orang ke minta gaga ke MyKad ari menua pesisir enggau enda tebayarka ukum mata duit.
“MyKad ti enda diambi deka ditaruh JPN pengelama 36 bulan, lalu enti mengkang enda diambi pengudah timpuh nya, MyKad deka dipadam dalam sistem enggau chara fizikal.” — DayakDaily
