TELUK INTAN: Langgur penemu apai indai nembiak ti dekaka Program Tusu 1Malaysia (PS1M) dikerembai ngagai sekula sekondari dudi ila, deka diperundingka.
Sapit menteri opis pelajar, Datuk P. Kamalanathan madahka opis menteri deka berundingka langgur penemu nya bepelasarka belanja ti diungkupka diatu ngambika pemaik ari PS1M ungkup sekula primari nya ulih dikerembai ngagai sekula sekondari di serata Malaysia.
“Langgur penemu nya disempulang enggau rintai nama ti patut nerima, ari Gerempung Apai Indai enggau Pengajar (PIBG) sereta ketuai raban bansa,” ku iya pengudah bejadi PS1M Renggat Nengeri Perak ba Sekolah Jenis Kebangsaan Tamil (SJKT) Ladang Batak Rabit, ditu pagi tadi.
Ku Kamalanathan, tuju bisi PS1M iya nya dikena nambahka pemakai enggau pengerai ngagai nembiak sekula primari, ngambika sida ulih mansang enggau manah ari sukut fizikal enggau mental.
Taun tu ku iya, 757,439 iku ari 7,780 primari di serata Malaysia bulih pemaik ari PS1M.
Opis menteri nya mega udah ngungkupka RM49.3 milion ke timpuh 3 Julai ngagai 2 Disember 2017.
Ku iya baru, program tu udah dipejalaika opis menteri pelajar kenyau ari taun 1983, tang diberi kelala baru ti dikumbai PS1M kena 9 Julai, 2010.- Bernama
