KUCHING, April 3: Kumpulan Wang Simpanan Pekerja (KWSP) nagit 100 peratus pengaji di Sabah enggau Sarawak nguna kereban e-bayaran ungkup pengawa ngenamaka duit ti dibayar pekereja nyerumba ujung taun tu.
Menijar Besai Kanan Opis KWSP, Azmi Awang madahka sida diatu nguji nambahka penyedar pengaji di Sabah enggau Sarawak ngambika nguna servis elektronik e-bayaran berindik ari pengaji di dua negeri u ba penuduk ke pemadu baruh dalam rintai penguna servis nya berada di banding enggau negeri diatu.
Ku iya, urung 68 peratus pengaji di Sabah nguna servis e-bayaran, lalu Sarawak 69 peratus, ke alai tu setipak enggau promosi agresif ti dipejalaika, ke alai KWSP pechaya tagit 100 peratus ulih dijapai nyerumba ujung taun tu.
Ku iya bayar nengah chara eletronik nya nyata ukai aja jampat, mudah sereta ngelimat jam tang ngasi agi laban nya ulih digaga sebarang maya ke ukai aja maya jam opis gawa.
“Kelimpah ari nya bayar nya mega lalu ulih terus dikredit ke akaun kaban KWSP nya enggau lengkas dibanding enggau bayar nengah chara manual ti ngambi timpuh urung sebulan sebedau ulih dikredit ke akaun sida,” ku iya ba sebengkah interviu ba opis KWSP Sarawak ditu kemari. — DayakDaily
