Kuing enggau tagit nentuka pemujur besekula, Jugah Muyang

Jugah nyuaka setipikit ngagai siku nembiak sekula SMK Lubok Antu rambau pengerami.

Follow and subscribe to DayakDaily on Telegram for faster news updates.


Dikarang Chris Bishop

KUCHING, 27 April: Kaban Parlimen (MP) Lubok Antu Jugah Muyang ngingatka diak pemujur tetiap iku nembiak sekula ukai semina bepanggai ba tusun atur sekula enggau komitmen bala pengajar aja.

Ku iya, nembiak sekula mega meseti nemu tuju sida ke besekula lalu bebendar ngiga pemandai sereta fokus belajar.


“Kitai pechaya, bala apai indai ngembuan perambu sereta udah netapka juluk tauka kuing lebuh maya nganjung anak sida besekula,” ku iya.

Jugah mansutka jaku nya ba Pengerami “Hari Permuafakatan dan Penetapan Target SPM serta PT3 2019 SMK Lubok Antu” ke diatur di Balai Besai SMK Lubok Antu, kemari.

Berindik enggau nya, iya madah tetiap iku nembiak sekula meseti netapka kuing enggau tagit diri.

“Enti sida udah netapka kuing diri, retinya sida meseti bebendar ngangkatka diri ngagai tikas ke tinggi agi. Kuing tu deka nguji pengering sida tang mengkang ba tikas ke ulih dijapai alai sida meseti bebendar agi belajar, lebih agi ari ke udah,” ku iya.

Jugah nambah, kuing enggau tagit enda ulih dijapai pia aja tang begunaka komitmen sereta disiplin.

Iya pechaya bala pengajar udah ngembing sereta meri ajar ngagai nembiak sekula sentang chara netap lalu nyapai tagit nya.

Nembiak sekula ku iya udah tentu deka berasai gaga enti sida mujur nyapai tagit ke udah ditetap.

Kelimpah ari nya, bala pengajar enggau apai indai deka mega sama bela gaga, tandu iya.

Jugah enggau nyemetak madah semina nengah pelajar aja tikas pengidup sereta ruang bilik sida ulih diangkatka manah agi.

Iya pechaya isu penyeranta peranak ke diau di menua pesisir ulih diputar nengah penyulut ba pelajar.

“Ngajihka program ke udah diperambu sekula deka meri empas ke manah ngagai sekula sereta bala nembiak,” ku Jugah.

Ba pengerami nya, Jugah bisi ngagihka belanja penyampau RM20,000 dikena meli enam unit air-cond baru enggau RM5,000 ungkup ngemujur aktiviti Gerempung Apai Indai enggau Pengajar (PIBG) SMK Lubok Antu.

Iya mega merunding deka nyendia belanja ngambi tau dikena ngaga balai tebuka SMK Lubok Antu.

Bela datai Pemesai Pekara Pelajar Pelilih (PPD) Lubok Antu Vivian Mujah. — DayakDaily