KUCHING, September 15: Semua batang pengarap besai di dunya bisi di Kuching lalu nya mandangka penyerakup entara pupu genap bansa ditu, ku Kepala Menteri Datuk Patinggi Abang Johari Tun Openg.
Pekara nya mega ku iya mandangka pemanah kaul tetiap peranak ditu tajapan bebida batang pengarap.
“Di tengah pasar Kuching, kitai bisi masjid lalu pia mega bisi Masjid Terapung. Mansang mimit ke mua bisi Grija Anglika (St Thomas).
“Sebedau grija nya kitai ulih meda ‘temple’ sida bansa Sikh. Muakka kiba, bisi tiga iti tepekong cina lalu enda jauh ari nya bisi Grija Roman Katolik.
“Reti nya, semua batang pengarap besai ba dunya didirika berimbai di Kuching lalu tu mandangka penyerakup enggau pemanah kaul kitai ditu,” ku Abang Johari.
Iya mansutka jaku nya rambau Program ‘World Cleanup Day’ di Kampung Masjid ditu, pagi tadi.
Berindik enggau nya ku iya nambah, orang bukai beteladan kitai ditu ketegal Sarawak siti negeri ke likun ke alai rayat idup ba siti ruang bilik ke sama.
Ngenang kaul ke sama, Abang Johari muji peranak Sarawak ketegal ti ngembuan ulah ti manah iya nya beresi ari sukut spiritual.
Ku iya, enti kitai beresi ari sukut spiritual, kitai ulih meretika orang bukai lalu ulih ngadu kaul ti manah.
“Kitai enda begedika orang bukai ketegal ulah ke baka tu baka uras.
“Enti beresi, kitai deka nempa gaya pengidup ke beresi ari sukut fizikal enggau spiritual,” tandu Abang Johari.
Beambika chunto St Joseph di Kuching, iya madah nembiak sekula nya enda ditagang ngadu sebarang pengawa ti tau mai pemaik.
Sekretari Perintah Negeri (SS) Tan Sri Muhamad Morshidi Abdul Ghani ku iya belajar di St Joseph lalu kala mega nyadi Sekretari Besai Gerempung Alumni Josipa.
“Sekretari (SS) kitai kala ngadu kelas agama di sekula St Joseph. Iya mega kala ngadu pekit macha Quran di sekula.
“Enti sekula nya St Yusuf enda ga kitai alit ati,” ku iya seraya betundi.
Reti nya, bisi pemereti entara kitai tajapan bebida batang pengarap, tandu Abang Johari. — DayakDaily
