Keretas perambu chara mayar royalti 20 peratus tembu dalam timpuh enam bulan

Dato' Seri Mohamed Azmin Ali (photo sourced from https://www.facebook.com/MohamedAzminAli)

KOTA KINABALU, September 15: Komiti Kabinet ti ditumbuh dikena nyendiaka keretas perambu bekaul chara mayar royalti ke udah ditambah ari lima peratus ngagai 20 peratus ungkup negeri pengeluar minyak nyengkaum Sabah, diberi tempoh enam bulan nembuka keretas perambu nya.

Menteri Hal Ehwal Ekonomi Datuk Seri Mohamed Azmin Ali, madah komiti ti diarika bala pengari ari empat buah negeri nyengkaum Sabah enggau Sarawak deka berandau ngaluska semua perambu sebedau dibantai ngagai kabinet ngambika ngaga pemutus.

“Meseti berunding enggau perintah negeri Sabah enggau Sarawak dalam perkara tu nyengkaum Sempekat Malaysia 1963 (MA63), enda tau enda dipenuhka dalam langkar Konstitusyen Perintah Besai. Tu mega entara pekara ke diperati komiti kabinet ti ditumbuh ti beratika MA63 dikemujur,” ku iya madah ngagai pemberita pengudah betemu enggau Kaunsil Ketuai Negeri PKR ditu sehari tu tadi.

Ku Azmin, entara pekara ti dikerandau enggau  sekeda negeri ke bekaul nyengkaum chara mayar 20 peratus royalti sekalika ari untung beresi asil petroleum menua tauka bepelasarka pemansut minyak enggau gis.

“Nya (chara mayar) entara pekara ti dipejuraika. Kitai meseti ngemedarka proses tu dipajakka. Aku meseti berandau enggau Sabah, Sarawak, ngambika sida mansutka penemu sereta ti dikedeka sida. Tu demokratik amat lalu kitai meseti mendingka penemu ari negeri nya,” ku iya. — DayakDaily