Dikarang Chris Bishop
KUCHING, 15 Mac: Malaysia meseti nyaup nentuka pengangat dunya ba ikas baruh ari 1.5 degree celcius ngambika ekonomi enggau eko sistem dunya seruran engkeman.
Sapit Menteri Kuasa, Sains, Teknologi, Rampa Menua enggau Ubah Gaya Hari Malaysia, Isnaraissah Munirah Majilis, madah pekara nya bepelasarka riput ke dikeluar Panel Antara Perintah sentang Ubah Gaya Hari (IPCC) ba taun 2018.
Ku iya, tanggungpengawa nya disan semua menua di dunya, baikka nya menua mansang ti ngembuan bemacham pengeraja asal tauka menua bukai alai ekonomi benung ngerembai baka Malaysia.
“IPCC mega mansutka penerang diak menua dalam kandang Asia Tenggara deka balat agi napi ubah gaya hari.
“Malaysia nyadang, tauka aku patut nyebut udah ngasaika ubah ba gaya ujan, ikas peninggi ai tasik ti majak niki, suah napi penusah ampuh bah ngenyit enggau gaya hari ke enda tentu.
“Semua tu enda mudah ditapi kitai,” ku Isnaraissah rambau bejadi licha ‘Clean Energy Collaboration’ ke diatur di siti hotel ditu, sehari tu.
Iya nambah, Malaysia ba penuduk lumur tiga pemadu mayuh ngeluarka gis karbon dioksida per kapita di Asia Tenggara nangkanka Brunei Darussalam enggau Singapura.
Berindik enggau nya ku iya, Malaysia meseti ngadu kerejasama enggau menua bukai ngambi ulih ngurangka empas negatif ari ubah gaya hari tu.
“Menua kitai keran ngurangka ikas karbon dioksida ke dikeluar ngagai 30 peratus manggai ba taun 2030 alai semua tu ulih dijapai enti kitai nguna kuasa ulih dikena baru,” ku iya.
Manggai ba taun 2030 ku Isnaraissah, Perintah Besai nagit nguna 20 peratus kuasa ulih dikena baru alai diatu semina dua peratus aja.
Ku iya, kitai diau ba menua ti ngembuan panchar mata panas enggau ujan lalu ketegal nya patut nadai napi sebarang penanggul nempa kuasa ulih dikena baru.
Licha ‘Clean Energy Collaboration’ diatur dua hari berunggu berengkah pagi tadi nyentuk ngagai ila lalu dikemujur Gerempung SAVE Rivers nengah saup gerempung ukai dikuasa perintah (NGO) bukai.
Nitihka penerang chairman SAVE Rivers, Peter Kallang, ba aum pengarang tembu pengawa bejadi, licha meri awak ngagai speaker enggau deligit bejuraika pekara berat ba sentang bekal kuasa enggau empas ba pengidup bansa asal kelebih agi sida ke diau ngelingi palan tekat ai.
Penyampau 160 iku penyereta nyengkaum ari lebih 30 genturung pendiau di Sarawak enggau serata Malaysia datai ngulu licha.
Antara sekeda speaker, Menteri Kereja Raya Baru Bian, Prof Dr Daniel M Kammen ari Universiti California, Mandal Presiden Bekal Letrik Menua Pesisir Sarawak Energy Bhd Dr Chen Shiun, Ex-Senator Menua Australia Christine Milne enggau Senator Adrian Lasimbang ari Gerempung TONIBUNG. — DayakDaily
