Kuasa ke diberi ukai dikena ngayaka diri empu aja — Dr Mahathir

Tun Dr Mahathir Mohamad

PUTRAJAYA, Julai 10: Menteri Besai Tun Dr Mahathir Mohamad kemari ngelalau bala ketuai enggau pengereja pengawa perintah anang ngena kuasa ke diberi ke pemerat diri, ruang bilik enggau bala bakih aja.

Bejaku lebuh ke betemu enggau bala staf Opis Menteri Besai di Bangunan Putra, tetiap iku penhereja pengawa perintah patut ngemeranka ulah ke manah lebuh ke ngaga pengawa sida.

“Kuasa ti diberi ukai dikena ngulihka pengaya tang kuasa ke diberi ungkup tuju ke patut dikena ngiring menua ti dikesayau enggau naka pemanah lalu kitai bisi pengelebih ke deka diguna enggau chara pengidup ti dipebasa,” ku iya.

Ku menteri besai, kekadang lebuh bisi peluang ngaga utai ungkup diri, bisi orang tepawah lalu enda ingat bejalaika pengawa sida.

“Kitai ukai diberi kuasa ba renggat tu dikena ngayaka diri tang ngambika ulih bejalaika pengawa.

“Nya meh kebuah lebuh kitai bekuasa, kitai tau ngelimpang, salah ngena kuasa, pechaya meh kitai empu ke pedis dudi ila,” ku iya.

Ambika chunto, daya pengidup ke dikemeran di menua maju, ku Dr Mahathir tebal agi rayat enggau pengatur pengawa bagas gawa, lurus, komited sereta belajar nguasa penemu.

“Sida mega ngemeran utai ti dipelajar sereta ngemeran chara pengidup ti manah ngambika nyadi sebagi ari daya pengidup,” ku iya.

Ku iya, bisi menua ke kurang maju ketegal rayat ke.lebih agi pengatur mena enda bepegai ba chara kereja ke manah.

Ku menteri besai, taja pan Malaysia enda ulih nyafi menua maju manggai ba taun 2020 baka ti dikeinginka iya, tang menua agi ulih nyapai status nya laban rayat menua tu bisi penau.

“Ke beguna iya nya pengelurus, bagas, kih gawa lalu ke beguna endar puas ati enggau asil kereja ukai enggau utai ke diulih kitai,” ku iya.

Ku Dr Mahathir baru, dikena nyapai juluk nyadi menua maju, anang semina bepanggai ba sami sembiang aja tauka sembiang pinta.

“Kitai udah besampi ngagai tuhan tang sampi nya mega meseti ditangkan enggau pengawa ti dikereja kitai, laban enti semina besampi enggau minta tang nadaj ngereja utai, semua ke dikingin enda begaring datai ngagai kitai,” ku iya. — DayakDaily