Kontraktor Bumiputera enda ditinggal ari tinda tebuka — Lim

Silhouettes of workers on a construction site. — DayakDaily.com file pic. // Photo: Pixabay

KUALA LUMPUR, Jun 4: Perintah Pakatan Harapan enda ninggalka kontraktor Bumiputera di menua tu ba pengawa muka polisi tinda tebuka ungkup tetiap projek perintah besai enggau negeri ti dipejalaika Perintah Pakatan Harapan.

Menteri Wang, Lim Guan Engmadahka bisi penyaru ari sukut pemereti mensia mayuh sentang konsep tender tebuka ti dipejalaika perintah ri ngembuan peragam ke ngujungka kontraktor Bumiputera ditinggal.

“Lebuh kitai nyebut sentang tinda tebuka, eti nya dibuka ngagai raban kontraktor Bumiputera aja, ukai dibuka ngagai bansa bukai baka ke dikerunding sekeda orang.

“Konsep udah dipejalaika kami di Pulau Pinang, lalu asil nya manah agi dibanding enggau tinda tetutup, laban nya ulih nentuka tetiap kontrak ke diberi sechara kompetitif,” ku iya dalam program Bicara Khas dikeluarka RTM1 ditu, malam kemari.

Lim madah, maya iya nyadi Kepala Menteri Pulau Pinang lebih 90 peratus projek perintah negeri dimenang kontraktor Bumiputera, mandangka sida ulih enggau besemekih.

“Anang ngemaruhka kontraktor Bumiputera. Di Pulau Pinang, sida udah mandangka penyanggup enggau pengulih sida besemekih,” ku iya.

Ku iya baru, perintah mega deka majak beratka raban orang indu, pengemeran Felda enggau projek infrastruktur, kelebih agi ti bekaul enggau perengkaguna ti meri pemaik ngagai rayat.

“Kami deka ngaga ketegal rayat, ungkup rayat, ukai ungkup sekeda kroni ngambika rayat ulih ngasaika, pengudah lima taun, pengidup sida manah agi dibanding ari diatu,” ku iya. — DayakDaily