LUBOK ANTU, Dis 22: Konsert Krismas Batang Ai 2018 deka diatur di Palan Tekat Ai, Batang Ai, berengkah jam 6.30 lemai nyentuk ngagai 12 tengah malam sehari tu.
Diatur Kelab Rekreasyen Batang Ai (BAREC), panggau pemerindang nya ngundang temuai dipebasa Menteri Muda Pemansang Industri ke mega Kaban Kunsil Negeri (ADUN) Batang Ai, Malcolm Mussen Lamoh.
Chairman pengatur pengawa, Brown Sang, madahka tuju ngatur konsert iya nya dikena ngerami musin Hari Krismas ke alai sama nyendiaka diri nyambut penatai Tuhan Jesus.
“Kedua, mensia mayuh kelebih agi sida ke diau ngelingi Batang Ai ulih begulai enggau raban artis kitai Iban ke benung popular maya ke diatu,” ku Brown.
Iya nambah, konsert nya siti ari aktiviti ti udah diperambu BAREC sebedau tu. Kelimpah ari bala artis, konsert tu ila mega deka mandangka raban koir Hari Krismas ari St Philip Church Lubok Antu.
Entara raban artis ti deka merindang iya nya; Pamelia David, Dorsica Robert, Stephanie Johnny, Angela Ryann, Dino, Rozanna JD, Eisner Nala enggau Isa Lee ke benung popular enggau lagu Tubai Pengerindu.
Semua artis ke datai merindang bela udah bisi lagu popular kediri ari album tauka single diri empu.
Eisner Nala udah dua kali menang anugerah ba Carta Sapa Juara Waifm (ACSJ). Iya mega kala menang ba Kategori ‘Vokal Terbaik’ enggau ‘Kategori Persembahan Terbaik’.
Mensia mayuh enda patut muai peluang tu laban konsert ke baka tu enda kala diatur begulai enggau koir gerija sereta enggau lapan iku artis Iban.
Malam tu, mayuh program bukai mega bisi diatur baka chabut tikit benasit, meda slide video aktiviti BAREC enggau bejual mayuh bansa barang ti narit ati.
Mensia mayuh diperansang sama bela datai bebala mayuh ngagai konsert tu.
Kelimpah ari BAREC raban bukai ke sama mantu ba pengerami tu iya nya sida ari Opis Pelilih Menua, Majlis Daerah Lubok Antu, PDRM, Opis Pengerai, SESCO enggau RELA. — DayakDaily
