Dikarang Chris Bishop
KUCHING, 30 Mac: Komando Australia, Sarjan Charles Frederick Sanderson, tauka Tuan Sandy, mengkang tebilang di menua Bario kenyau jeman perintah Jepun ba taun 1945 nyentukka diatu.
Nengah operasi “Semut 1”, Sanderson sereta seraban lapan iku Komando (paratrooper) “Z” Unit betuaika Mejar Tom Harrison, muai diri ari bilun nguna payung terjun ba menua Bario kena 25 Mac, 1945.
Dalam timpuh tiga bulan udah nya, Tuan Sandy udah mandangka pemerani sereta pengelandik beperang ti ngujungka iya bela digelar “King of Limbang River” di Sarawak.
“Nengah perintah Mejar Harrison, Fred Sanderson diasuh matih raban Dayak nyadi gerila ngelaban soldadu Jepun,” ku anak lelaki Sanderson, David Sanderson.
David seharitu bisi di Pustaka Negeri Sarawak, alai iya ngambi bagi seraya bekunsi cherita ba program “Menjejaki Bario”.
Program diatur nengah kerejasama Gempung Pengarang English Tunga Utara (SOSWE).
Ngenang kaul ke sama David nusui diak dalam timpuh ke pandak, apai iya udah mujur matih lebih 500 iku bujang berani Iban sentang chara perang.
Ketegal pemerani, penaluk sereta pengeran ngemujur tanggungpengawa ke diberi maya operasi “Semut 1”, C F Sanderson nerima “Distinguished Conduct Medal”.
Bedau lama tu tadi, iya nya kena 25 Mac, 2019, David bisi ngulu pengawa ngingatka genap 74 taun penyangkai sida seraban lapan iku paratrooper ke diatur di Bario.
Pengawa nya bela digulu Lt Gen (Rtd) Datuk Stephen Mundaw enggau ADUN Murum Dato Gerawat Gala. — DayakDaily
