Taun nemuai Sarawak 2019 nagit 5 juta iku orang dagang temuai — Abdul Karim

Abdul Karim (tengah) bejadi pra-ngelanchar Aum BIMP-EAGA. Bela dipeda Sekretari Perintah Negeri Tan Sri Mohd Morshidi Abdul Ghani (kiba) enggau Sapit Ketuai Sekretari Opis Menteri Pekara Ekonomi Malaysia, Dato Dr Noor Zari.

Dikarang Chris Bishop

KUCHING, 30 Mac: Nengah kimpin taun nemuai ke Sarawak 2019, negeri tu nagit nerima lima juta iku orang dagang temuai.

Menteri Dagang Temuai, Seni, Main Asal, Nembiak enggau Lumba Datuk Abdul Karim Rahman Hamzah pechaya juluk nya ulih dijapai bepelasarka pemayuh produk dagang temuai enggau program ke bisi diatur di Sarawak.

“Produk kitai ke pemadu baru iya nya Kampus Muzium Sarawak ti disadang tembu digaga ba bulan April taun tu. Opis menteri mega merambu ngemasukka Taman Negara Niah nyadi palan UNESCO.

“Taun nemuai ke Sarawak udah dilanchar alai kitai chakah ngelakuka negeri di mata dunya nengah ‘tagline’ – Sarawak, More To Discover,” ku iya.


Abdul Karim mansutka jaku nya ba pengawa pra-ngelanchar Aum Menteri Menteri Kandang Menua Pengerembai Asean Timur, Brunei, Indonesia, Malaysia enggau Filipina (BIMP-EAGA) di siti hotel ditu, malam tadi.

Aum BIMP-EAGA deka diatur berengkah 20 nyentuk ngagai 24 November, 2019, di Kuching.

Kelimpah baum, Kuching mega dipilih ngatur pengerami Makai Lemai Ngintu Genap 25 Taun BIMP-EAGA sereta Festival Budayaw ke-2.

Budayaw sebengkah festival main asal ti mandangka seni enggau main asal empat bengkah menua BIMP-EAGA lalu deka dipasuk lebih 400 iku penyereta.

“Pengawa lima hari berunggu tu deka diatur di Kuching alai peranak mengeri tu bela diperansang ngambi bagi.

“Mayuh macham seni enggau main asal deka dipandang bala pengari ari menua BIMP-EAGA nyengkaum pengari ari gempung pemansang nengah semengat bekunsi penau,” ku Abdul Karim nambah.

BIMP-EAGA ditumbuhka 25 taun ke udah di Mengeri Davao, Filipina, iya nya kena 24 Mac, 1994, lalu netapka juluk ngelengkas pemansang ekonomi di empat bengkah menua.

Juluk tu meratka pengawa ngangkatka tikas dagang, dagang temuai enggau atur beranakka puku alai inisiatif tu dikemujur nengah kerejasama piak perintah enggau pribit. — DayakDaily