KM bebendar deka ngangkatka Sarawak nengah polisi iya

Chief Minister Datuk Patinggi Abang Johari Tun Openg - file pic

KUCHING, Dis 25: Datuk Patinggi Abang Johari Tun Openg dalam jaku pesan iya beserimbai enggau Pengerami Ngintu Krismas enggau Taun Baru 2018, madahka perintah udah ngambi semua atur ke patut dikena nentu bemacham inisiatif ti bantaika iya kenyau nyadi Kepala Menteri kena 13 Januari suba, ulih dikemujur dalam timpuh entara dua ngagai lima taun ke deka datai.

Ambis nadai 12 polisi udah dibantaika Kepala Menteri dalam timpuh 11 bulan ke udah ke alai entara nya ekonomi digital, SarawakPay, Sarawak Pintar, numbuhka Petros, Bank Pemansang Sarawak (DBoS), Sistem Transit Aliran Ringan sereta numbuhka sekeda ejensi tauka Kaunsil Hulu Rajang enggau Tanah Tinggi.

Iya mega mantaika agih belanja RM1 bilion dikena ngaga tiang telekomunikasi dikena ngeneraska internet, RM1 bilion dikena ngaga sereta ngemanah sekula ti udah tuai sereta repuk di menua pesisir.

Abang Johari madahka nya sebagi ari proses transformasi ti dipejalai dikena ngangkatka Sarawak ke pemaik 2.7 juta rayat di negeri tu.

“Semua inisiatif tu begunaka timpuh ngemujurka nya rang perintah udah ngambi singkang ke patut dikena nentuka juluk ati nya ulih dijapai dalam timpuh dua ngagai lima taun ” ku iya.


“Aku mangku bertanggungpengawa besaum enggau rayat sentang kuing Sarawak ke deka dibai aku nyadi Kepala Menteri. Kitai enda teulihka pemansang baka selama agi enti kitai deka nyapai status menua maju nyerumba taun 2030,” ku iya.

Ku iya, nitihka pakar, pemansang KDNK Sarawak meseti manggai urung 6 peratus tetiap taun enti deka nyapai status negeri maju. — DayakDaily