KKM: Orang sakit Covid-19 dikemendar pulai ke rumah pengudah 14 hari diperubat

Image by fernando zhiminaicela from Pixabay

Read the English version here: https://dayakdaily.com/covid-19-patients-allowed-to-return-home-upon-completing-treatment-even-if-13th-day-test-positive/

KUCHING, Mei 27: Orang sakit Covid-19 di Malaysia dikemendar pulai ke rumah pengudah 14 hari diperubat tajapan asil peresa tubuh ke digaga ba hari ke-13 mengkang positif.

Direktor Opis Pengerai Malaysia (KKM) Datuk Dr Noor Hisham Abdullah madah, pemutus ngubah protokol opis menteri ke bekait enggau orang sakit Covid-19 nya digaga bepelasarkan penetap baru ke dikeluar Pertubuhan Kesihatan Sedunia (WHO).

“Nitihka penetap WHO, tajapan asil peresa Polymerase Chain Reaction (PCR) positif ba hari ke-13, KKM tau ngemendar orang sakit Covid-19 pulai ke rumah pengudah 14 hari.

“Pansik ke diadu ba Korea Selatan enggau Taiwan mandangka orang sakit Covid-19 enda ngerampit orang bukai pengudah 14 hari.


“Tajapan dikemendar pulai, orang sakit dipinta enda pansut ari rumah diri pengelama 2 minggu,” ku iya ba aum pengarang berita ninting hari Covid-19 di Putrajaya kemari.

Dr Noor Hisham nambah, sebedau tu bisi orang sakit Covid-19 ke diperubat diau di spital ngelui 14 hari ketegal asil peresa PCR ba hari ke-13 mengkang positif.

“Ke pemadu berat iya nya ikas pengerekai igi penyakit ari orang ke sakit. Pengudah 14 hari, orang sakit Covid-19 enda ngerampit orang bukai,” ku iya. — DayakDaily