PUTRAJAYA, Jun 25: Ketuai Negeri Sabah enggau Sarawak kemari mandangka sukung ngagai Menteri Besai Tun Dr Mahathir Mohamad nyadi ketuai ngiring sereta ngemansangka menua.
Pekara nya dipandangka ba pengerami makai begulai enggau Dr Mahathir ke diatur ba Seri Perdana ditu, ke digulu Kepala Menteri Sabah Datuk Seri Mohd Shafie Apdal enggau Kepala Menteri Sarawak Datuk Patinggi Abang Johari Tun Openg sereta bala ketuai kedua-dua negeri.
Mohd Shafie ti dikerandau pengudah atur pengawa nya madahka komitmen perintah negeri Sabah deka ngeratka kaul enggau perintah besai ke pemansang menua.
“Ke beguna amat laban Sabah enggau Sarawak negeri ti kitai peda ari sukut numbuhka menua.
“Kami deka madah ngagai menteri besai ke alai kami nyukung iya nyadi ketuai menua ngambika iya ulih ngemansangka menua kitai,” ku Mohd Shafie.
Ditanya sekalika isu penyereta pengari kedua-dua negeri nya dalam Kabinet perintah besai bisi kerandau ba pengerami nya, Mohd Shafie madahka perkara nadai disebut tang nyerah ngagai menteri besai ngambika ngaga pemutus.
Iya mega madah sebedau tu kala madah pasal pemesai reti pengari ari Sabah enggau Sarawak dalam Kabinet menteri besai.
“Nya kuasa penuh iya (menteri besai) laban ke beguna amat kitai bisi enggau.
“Kitai nemu nya pengawa ke ditegi lalu menteri besai meretika nya,” ku iya.
Abang Johari ke selubang penemu enggau Mohd Shafie madahka menteri ngangauka kedua-dua ketuai negeri ngagai pengerami nya dikena ngerapitka kaul enggau oerintah besai ke tentu deka meri empas ke manah ngagai menua.
“Nadai isu ti dikerandau, semina nehulai ngerami hari raya.
“Kabinet tnadai dikerandau. Semina bejakuka pasal pemakai ke nyenyamai aja,” ku iya nundi. — DayakDaily
