Ketuai raban bansa patut ngenataika polisi perintah ngagai rayat

Wilson Nyabong Ijang

KAPIT, Dis 24: Ketuai raban bansa patut meretika polisi enggau program pemansang perintah ngambika ulih dikenatai ngagai rayat.

ADUN Pelagus Wilson Nyabong Ijang madah, ketuai raban bansa nyadi penatai pemansut pemadah ngagai peranak menua ti dekaka polisi nya ti mandangka perintah deka meri pemaik ngagai rayat.

“Ba dunya diatu, ketuai raban bansa patut jampat nemu sereta meretika tetiap iti polisi mgambika program ti dipejalaika nya mujur.

“Nya kebuah ketuai raban bansa meseti semampai belajarka utai ti baru mgambika nengah pengelandik ulih ngenataika pemadah ke betul ari perintah.

Ku Nyabong, perintah diatu benung ngemujurka sistem ngenataika pemadah nguna teknologi ke baru sereta negapka ekonomi digital.


“Ketuai raban bansa patut nguasa pengelandik bekaul teknologi ti ngemudahka pemadah dikenatai ngagai peranak menua,” ku iya lebuh ke bejaku ba sebengkah pengerami bala ketuai raban bansa bagi menua Kapit di Kapit empai lama udah. — DayakDaily