Sri Aman, Okt 20: Surat tesau ari Opis Sekretari Perintah Negeri ti nagang ketuai pupu bansa datai ngulu pengerami Perintah Besai Pakatan Harapan (PH) baka ke nginsil hak rayat, ku Mandal Chairman DAP Sarawak Leon Jimat Donald.
Iya madah Sarawak nyemaka negeri bukai dalam Federasyen Malaysia ti meranka atur demokrasi alai rayat bisi hak ngulu sebarang pengerami ke bisi diatur.
“Gabungan Parti Sarawak (GPS) balat irau diatu lalu nya nyadika kebuah sida ngeluarka surat tesau.
“Surat tauka perintah nya nagang raban ketuai pupu bansa di serata negeri datai ngulu pengerami ti nadai dikemendar Perintah Negeri,” ku Leon rambau nyuaka cek bantu ngagai Gerempung Teochew ditu, kemari.
Cek ari Sapit Menteri Dagang Dalam Menua enggau Pekara Bebeli Barang (KPDNHEP) Chong Chieng Jen diterima chairman gerempung, Tan Choon Poh.
Ngenang kaul ke sama, Leon ngelalau rayat enda nangika perintah nya ketegal Perintah Besai PH nyendia mayuh program enggau bantu ungkup rayat.
Ku iya, rayat ngembuan hak lalu meseti ngenataika pinta ba pekara pemansang.
“Pinta nya tau dikenatai lalu aku ulih nyadi penyambung entara kita enggau Perintah Besai. Ketuai pupu bansa sereta gerempung nyadi orang ti ngarika komuniti lalu ketegal nya meseti ngadu kerejasama enggau Perintah, sekalika nya Perintah Besai tauka Negeri.
“Semua nya ungkup pemaik rayat ti diarika ketuai,” ku Leon ke mega Chairman DAP Sri Aman.
Surat tesau ke disain Sekretari Perintah Negeri Tan Sri Mohamad Morshidi Abdul Ghani kena 11 Oktober 2018 udah dianjung ngagai semua opis residen serata Sarawak. — DayakDaily
