KUCHING, MAC 11: Raban Ketuai Komuniti Simunjan minta MP Sri Aman, Datuk Masir Kujat ngusungka penuduk parlimen Sri Aman.
Pinta nya dikenatai pengudah sida enda arapka jaku sereta begedika ulah Masir ti engkejuk kiba kanan.
Pemancha Peter Mooney pechaya penyakit “Enda bula enda menang ” udah ngerekai ke Sri Aman lalu di bai Masir.
“Kami nadai pechaya ka Masir agi. Iya madahka diri enda nerima pinta Menteri Besai ti ngasuh iya mangku pengawa ba tusun kabinet baru.
“Sapa iya ba mata Menteri Besai, sereta naka ni pemesai parti alai iya berindik?
“Sapa orang ti deka arapka MP ke seruran engkejuk?” tanya Peter.
Masir ba sebengkah pengerami di Kampung Kedumpai bedau lama tu tadi madah enda nerima pangku pengawa nyadi menteri ke deka diberi Muhyiddin ngagai iya.
Tambah Peter, rayat diatu udah jera dikeduan MP(Masir) ti ukai semina nyadung berita bebula tang rindu engkejuk kiba kanan.
Bedau lama tu tadi ku iya, Masir dipeda nyukung Tun Mahathir tang ngalih nyukung Muhyiddin, tang udah nya narit pulai sukung iya.
“Enda tegap runding enggau penemu MP bakatu. Mayuh agi MP bukai ke landik ke tau di pilih Muhyiddin.
“Suba iya menang nengah tikit PRS. Rayat diatu pedis ati ketegal iya engkejuk ninggalka pengundi ke nyukung iya,” ku Peter.
Berindik enggau nya, Peter ngelalau Masir ngambika ngetu nyadung berita ke enda engkeman ngagai rayat.
Rayat diatu udah nemu bagi ke lurus enggau ke bebula, tandu Peter.
Sepenemu enggau tuduh nya, Pengulu Johnny Limi ari Pantu madahka Masir ngelakar bala pengundi ketegal ulah iya ti udah ningkilka diri ari PRS.
Ku Johnny, rayat udah ngundi lalu nentuka iya menang sereta ngarapka iya mai pemansang ngagai rayat.
‘Diatu iya(Masir) nadai agih belanja RTP penyampau RM5 juta enggau MRP penyampau RM2 juta dikena ngatur pemansang menua pesisir.
“Iya mega nadai kuasa ba opis perintah Sarawak enggau ba perintah besai ketegal ti udah nyadi penyakal.
“Masir meseti ingat, rayat asa ati diatu lalu enda agi deka nyukung sereta ngundi iya,” ku Johnny.
Ku Johnny nambah, Masir nadai mai pemansang ke nyengenda besai tajapan udah tiga penggal nyadi MP Sri Aman.—DayakDaily.
