SIBU, Dec 2: Produk asal Sarawak baka gula apong, lada serta kraf jari bisi peminta ke tinggi ba makit global.
Rebak baru patut landik sereta kreatif beambi ulih ari teknologi digital dikena ngangkatka sereta ngerembaika produk sida ngagai renggat dunya.
Menteri Dagang Entarabangsa enggau e-Dagang, Dato Sri Wong Soon Koh lebuh bejadika Aplikasi Servis Nganjung Gis Dikena Nyumai MyGas kena Hari Lima tu tadi dekaka rebak baru nguna teknologi digital nyadi platform ngatur sereta ngelakuka dagang enggau produk sida.
Wong ke mega Menteri Wangan Kedua muji inisiatif syarikat Pelita Laju Sdn Bhd ngemansangka aplikasi MyGas dikena meri servis nganjung gis dikena nyumai sechara online.
Aplikasi MyGas mega ulih didownload nengah GooglePlay enggau AppStore.
Penguna tau minta ajungka gis nya nengah chara meri address endur nganjung sereta milih produk lalu mayar sebedau gis nya dianjung.
Wong ngarapka pengawa nya nyadika chunto ngagai orang dagang biak sereta lalu nimbal pengingin Kepala Menteri Datuk Patinggi Abang Johari Tun Openg bekaul enggau ekonomi digital. — DayakDaily
