KUCHING, NOVEMBER 26: Sekretari Besai Parti Bansa Dayak Sarawak Baru (PBDS Baru) Julius Enchana minta Opis Menteri Dalam Menua (KDN) ngaga pemutus ba sentang apil ke udah dikenatai parti ba bulan September 2019.
Ku iya, KDN patut enda betangguh ngerejister baru PBDS Baru ari ti udah dikinsil Opis Pengerejister Gerempung (ROS) kena 12 Jun 2019 tu tadi.
“Surat apil udah disua ngagai KDN kena 24 September 2019 lalu udah diterima Sekretari ‘Sulit’ opis menteri.
“Salin surat nya mega bisi diberi ngagai tiga iku sekretari KDN,” ku iya nengah surat penerang berita seharitu.
Berindik ari nya, Julius ngarap apil nya udah dikenatai ngagai Menteri Dalam Menua, Tan Sri Muhyiddin Yassin.
Nambahka nya ku iya, surat sukung ari ROS mega udah dianjung ngagai KDN.
“Semua tanya udah disaut nengah surat, lalu kami udah nurut ka semua pinta ROS enggau KDN. Nya alai, nadai kebuah piak sida betangguh ngerejister baru parti tu,” ku iya.
Julius nambah, PBDS Baru dikinsil ketegal penanggul ba tusun atur parti enggau saru penemu entara ketuai parti ti dulu ti enda nganjung ripot ninting taun sereta ripot aum tiga taun.
Ketegal ti udah dikinsil, Julius ngasai bansa Dayak diatu baka temuai dalam politik ketegal ti nadai rumah lalu semina ngenduh ba parti bukai.
Iya minta bansa Dayak pulai magang ngagai PBDSB Baru jemah ila ngambi sama bela ngeringka parti.
“Anang enda ingatka jaku niang Daniel Tajem, politik Dayak pecah seribu.
“Diatu meh maya kitai ngeraup sereta nyerakup baru kuasa Dayak ba politik.
“Badu mambar kediri agi,” ku iya seraya madah Dayak begunaka PBDS Baru ngambi tau dikena negika bansa diri.
